वैशाख ३० गते हुने स्थानीय तहको निर्वाचनमा गोरखामा विभिन्न स्थानमा खटिने म्यादी प्रहरीलाई सुरक्षा सम्बन्धी आधारभूत तालिम दिएको छ । गोरखा सदरमुकाममा शुक्रबार एक कार्यक्रमका बीच म्यादी प्रहरीको आधारभूत तालिम समापन गरिएकोे जिल्ला प्रहरी कार्यालय गोरखा एसपी केदार खनालले बताए ।
जिल्ला प्रहरी कार्यालय गोरखाकाअनुसार जिल्लाका चार स्थानमा म्यादी प्रहरीहरुका लागि तालिम संचालन गरिएको थियो । ईलाका प्रहरी कार्यालय आरुघाट, जौवारी, पालुङटार र जिल्ला प्रहरी कार्यालय सदरमुकाममा म्यादी प्रहरीलाई तालिम दिइएको एसपी खनालले जानकारी दिए । उनकाअनुसार १७ सय ७२ तालिममा सहभागी भए ।
१० दिनको अवधिमा मतदान प्रक्रिया, मतदानमा सुरक्षाका लागि अपनाउनुपर्ने उपायहरु लगातका निर्वाचन सम्बन्धी आधारभूत कुराहरु सिकाइएको उनले बताए । लाठी अभ्यास, शारीरिक ब्यायम, सलाम गर्ने तरिका लगायतको बारेमा प्रहरीले म्यादीलाई अभ्यास गराएका थिए । म्यादी सम्बन्धी आधारभूत तालिम सम्पन्न भएपछि सबैलाई नजिककै प्रहरी चौकीमा खटाइएकोे र बैशाख २० गतेपछि सबैलाई आ(आफ्नो कार्य क्षेत्रमा खटाइने एसपी खनालले जानकारी दिए ।
म्यादी प्रहरीमा भर्ना भएका सबैलाई आफ्नो पालिकाबाहेक अन्य पालिकामा खटाउने गरी तयारी भइरहेको एसपी खनालले बताए ।
सेवा सुविधाको हकमा म्यादी प्रहरीका लागि मासिक एक महिनाको तलब ३० हजार २ सय रुपैया र पोशाकमा ६ हजार, रासनमा ७ हजार र भ्रमण खर्चमा एक हजारको व्यवस्था गरिएको छ । त्यस्तै, स्थानीय तहको निर्वाचनमा भौगोलिक विकटता र राजनीतिक दृष्टिकोणले मतदाता स्थलहरुलाई संवेदनशील, अतिसंवदेनशील र सामान्य गरी तीन भागमा वर्गीकरण गरेको छ ।
यसरी वर्गीकरण गरेका संवेदनशील मतदानस्थलमा ६ जना म्यादी प्रहरी, ३ जना प्रहरी, अतिसंवेदनशील मतदानस्थलमा ८ जना म्यादी प्रहरी, ३ जना प्रहरी र सामान्य क्षेत्रमा ४ जना म्यादी प्रहरी र ३ जना प्रहरी खटाइने व्यवस्था गरिएको एसपी खनालले जानकारी दिए । उत्तरी गोरखा दुर्गम क्षेत्र चुमनुब्रीमा २० गतेदेखि म्यादी प्रहरी खटाइने र सो लगत्तै अन्य पालिकामा पनि खटाइने उनले जानकारी दिए । दराैंदीबाट साभार
