“शिक्षित बालबालिकाबाट नै विश्वमा परिवर्तनको थालनी हुन्छ” भन्ने मूल नाराका साथ सञ्चालित बालिका शिक्षा कार्यक्रम अन्तर्गत सराेकारवालाहरूसँगको समीक्षा बैठक सम्पन्न भएको छ। कार्यक्रमको उपलब्धि, चुनौती र आगामी रणनीतिबारे सराेकारवालाहरुसंग छलफल गरिएकाे हाे ।
गोरखाको पालुङटार नगरपालिका–७ च्याङलीस्थित जीवन ज्योति माध्यमिक विद्यालयमा सञ्चालित बालिका शिक्षा कार्यक्रम
Room to Read काे आर्थिक तथा प्राविधिक सहयाेग र UN Nepal को व्यवस्थापनमा सञ्चालित बालिका शिक्षा कार्यक्रम अन्तरगत आयोजित कार्यक्रममा विद्यालय व्यवस्थापन समिति, शिक्षक, अभिभावक, स्थानीय जनप्रतिनिधि, बाल क्लबका प्रतिनिधि तथा कार्यक्रमका सहभागी बालिकाहरूको उल्लेख्य सहभागिता रहेको थियो।
विद्यालयका प्रधानाध्यापक कुमार प्रसाद ढकालको सभापतित्वमा सम्पन्न कार्यक्रममा शिक्षक अभिभावक संघकी अध्यक्ष कोपिला कुमाल, बालिका शिक्षा कार्यक्रमकी फोकल शिक्षक कमला पन्थ लगायतको उपस्थिति रहेको थियो। कार्यक्रमको सञ्चालन डा. रविन्द्र कंडेलले गरेका थिए।
कार्यक्रममा प्रस्तुत गरिएको समीक्षा प्रतिवेदनअनुसार सन् २०२३ देखि विद्यालयमा सञ्चालन हुँदै आएको बालिका शिक्षा कार्यक्रमले बालिकाहरूको विद्यालय उपस्थितिमा सुधार, सिकाइ उपलब्धि अभिवृद्धि, नेतृत्व विकास, जीवनोपयोगी सीपको विकास तथा लैङ्गिक समानताको प्रवर्द्धनमा सकारात्मक प्रभाव पारेको छ।
UN Nepal गोरखाका कार्यक्रम अधिकृत उमेश बिश्वकर्माले सो बिद्यालयमा सञ्चालित बालिका शिक्षा कार्यक्रममा भएका उपलब्धीसहित तथ्याँकहरूको समेत विश्लेषण गरी प्रस्तुतिकरण गर्नुभएको थियो ।
कार्यक्रमका सहभागी छात्रा दिपिका कुमाल र कृति कुमालले आफ्ना अनुभव सुनाउँदै कार्यक्रमले आफूहरूमा आत्मविश्वास बढाएको, सार्वजनिक रूपमा बोल्न सक्ने क्षमता विकास गरेको तथा अध्ययनप्रति थप प्रेरित बनाएको बताए। उनीहरूका अनुभवले कार्यक्रममा सहभागी अभिभावक र सरोकारवालाहरूलाई भावुकसमेत बनाएको थियो।
खुला छलफलका क्रममा सहभागीहरूले बालिका शिक्षालाई अझ प्रभावकारी बनाउन विद्यालय, अभिभावक, समुदाय र स्थानीय सरकारबीचको सहकार्य थप मजबुत बनाउनुपर्नेमा जोड दिएका थिए। साथै, किशोरीहरूका लागि नेतृत्व विकास, जीवनोपयोगी सीप र सुरक्षित सिकाइ वातावरणलाई आगामी वर्षमा अझ सशक्त बनाउन सुझावहरू प्रस्तुत गरिएका थिए।
अतिथिहरूले बालिका शिक्षामा लगानी गर्नु भनेको समाजको भविष्य निर्माण गर्नु भएको उल्लेख गर्दै यस्ता कार्यक्रमले ग्रामीण क्षेत्रका बालिकाहरूलाई शिक्षा र अवसरमा पहुँच विस्तार गर्न महत्वपूर्ण भूमिका खेलेको बताए।
प्रधानाध्यापक कुमार प्रसाद ढकालले विद्यालयमा सञ्चालन भइरहेको कार्यक्रमले बालिकाहरूको शैक्षिक तथा व्यक्तिगत विकासमा उल्लेखनीय योगदान पुर्याएको बताउँदै आगामी दिनमा पनि यसलाई अझ प्रभावकारी रूपमा अघि बढाइने प्रतिबद्धता व्यक्त गरे।
बैठकले कार्यक्रमको प्रभावकारिताको समीक्षा गर्दै आगामी वर्षका लागि सुधारका क्षेत्रहरू पहिचान गर्नुका साथै बालिका शिक्षाको दिगोपनाका लागि साझा प्रतिबद्धता निर्माण गर्ने निष्कर्ष निकालेको छ।
विद्यालय परिवारले कार्यक्रममा सहभागी सम्पूर्ण सरोकारवाला, अभिभावक, शिक्षक, विद्यार्थी तथा सहयोगी संस्था Room to Read र UN Nepal प्रति आभार व्यक्त गर्दै बालिका शिक्षाको सुदृढीकरणका लागि आगामी दिनमा पनि निरन्तर सहकार्य रहने विश्वास व्यक्त गरेको छ।
