जीवनज्योति माविमा मानसिक स्वास्थ्य सचेतना तथा जीवनशैली परिवर्तन सम्बन्धी कार्यक्रम सम्पन्न
पालुङटार नगरपालिका वडा नम्बर ७, च्याङ्लीस्थित जीवनज्योति माध्यमिक विद्यालयमा मानसिक स्वास्थ्य सचेतना तथा स्वास्थ्य सम्बन्धी विशेष कार्यक्रम सम्पन्न भएको छ।
कार्यक्रममा मानव जीवनमा देखिने मृत्युका मुख्य कारणहरू, रोगका प्रमुख कारणहरू तथा अस्वस्थ जीवनशैलीका असरहरूबारे विस्तृत छलफल गरिएको थियो। साथै, दैनन्दिन जीवनशैलीमा सुधार ल्याएर दीर्घ तथा स्वस्थ जीवन जिउन आवश्यक उपायहरूबारे विद्यार्थी तथा सहभागीहरूलाई सचेत गराइएको थियो।
कार्यक्रमका प्रमुख सहजकर्ता (Facilitator) प्रदेश जन स्वास्थ्य कार्यालय गोर्खाका वरिष्ठ अधिकृत नवराज खड्काले मानव स्वास्थ्यमा जीवनशैलीको प्रत्यक्ष प्रभाव हुने उल्लेख गर्दै असन्तुलित खानपान, शारीरिक निष्क्रियता, तनाव तथा गलत बानीहरू रोग र असमय मृत्युका प्रमुख कारण हुने बताए।
उनले विद्यार्थीहरूलाई नियमित व्यायाम, सन्तुलित आहार, सकारात्मक सोच तथा मानसिक स्वास्थ्यमा ध्यान दिनुपर्ने आवश्यकता औंल्याउँदै जीवनशैली परिवर्तन नै स्वस्थ समाज निर्माणको आधार भएको धारणा व्यक्त गरे।
विद्यालय प्रशासनका अनुसार यस्तो कार्यक्रमले विद्यार्थीहरूमा स्वास्थ्यप्रति सचेतना बढाउने र भविष्यमा जिम्मेवार नागरिक बनाउन महत्वपूर्ण भूमिका खेल्ने अपेक्षा गरिएको छ।
कार्यक्रममा सहभागीहरूले स्वास्थ्य सम्बन्धी विविध विषयमा अन्तरक्रिया गर्दै आफ्ना जिज्ञासा पनि प्रस्तुत गरेका थिए।
कार्यक्रममा विद्यालयका शिक्षकहरू, विद्यालय व्यवस्थापन समितिका पदाधिकारीहरू, स्वास्थ्य संस्थाका स्वास्थ्यकर्मीहरू लगायतका उपस्थिति रहेको थियो ।
