गोरखा — आँपपिपल अस्पताल ले स्वास्थ्य बिमा कार्यक्रमअन्तर्गत औषधी वितरण प्रक्रियामा नयाँ व्यवस्था लागू गरेको छ। अबदेखि बिमा सुविधाअन्तर्गत औषधी लिन सम्बन्धित बिरामी स्वयं अनिवार्य रूपमा उपस्थित हुनुपर्ने व्यवस्था गरिएको अस्पतालले जनाएको छ।
अस्पतालद्वारा जारी सूचनाअनुसार बिरामीको सट्टामा आफन्त, सहयोगी वा अन्य कुनै प्रतिनिधि (प्रोक्सी) मार्फत औषधी लिन पाउने व्यवस्था अब मान्य नहुने स्पष्ट गरिएको छ। साथै, औषधी पुनः-भर्ना (रिफिल) प्रक्रियामा समेत बिरामी स्वयं उपस्थित हुनुपर्ने व्यवस्था कायम गरिएको छ।
अस्पताल प्रशासनका अनुसार बिरामीको उचित स्वास्थ्य मूल्याङ्कन, औषधीको सुरक्षित वितरण तथा स्वास्थ्य बिमा कार्यक्रमसम्बन्धी नियमहरूको प्रभावकारी कार्यान्वयन सुनिश्चित गर्न यो निर्णय लागू गरिएको हो।
यो नयाँ व्यवस्था तत्काल प्रभावबाट लागू भएको अस्पतालले जनाएको छ।
आँपपिपल अस्पतालमा बिमा औषधी लिन बिरामी स्वयं उपस्थित हुनुपर्ने नयाँ व्यवस्था लागू
