व्यास नगरपालिका–१ खकौलीमा पाखो बारी जोत्ने क्रममा टयाक्टर दुर्घटनामा परी २८ बर्षीय कमल बहादुर दरैको मृत्यु भएको छ । गत बुधबार स्थानीय धन बहादुर दरैको पाखोबारी जोत्ने सिलसिलामा टयाक्टर दुर्घटना हुँदा दरैको मृत्यु भएको हो । बुबाआमाको समेत स्वर्गारोहण भैसकेका दरैका यही आउँदो बैशाख महिनामा बिहे गर्ने योजना रहेको पारिवारिक स्रोतबाट खुल्न आएको छ । मृतक दरै नेपाली काँग्रेस खकौली टोलका सभापति समेत हुन् । सामाजिक क्रियाकलापमा सक्रिय दरै खकौली टोल विकास संस्थामा अध्यक्ष भएर काम गर्दै आएका थिए । बिहे गर्नका लागि घरमा खसीबोका पालेर तयारी अवस्थामा राखिएको स्थानीय एवं वडासचिव मञ्जु कँडेलले जानकारी दिइन् । सबैसंग राम्रो बोलीचाली भएका दरैको निधनको खबरले सपना जस्तो लाग्ने गरेको उनले बताइन् ।
दरै हाल दाजु भाउज्यूको साथमा बस्दै आएको बताइएको छ । लु ३ त १३३५ नंम्बरको ट्याक्टरले बारी जोत्ने क्रममा अचानक टयाक्टर बारीको छेउबाट तल खस्न जाँदा सोही टयाक्टरले च्यापिएको दरैको मृत्यु भएको प्रहरीले जनाएको छ । ट्याक्टरले च्यापेर गम्भिर घाईते भएका दरैको उपचारको क्रममा दमौली अस्पतालमा मृत्यु भएको हो । टोलका अध्यक्ष दरैको निधनले सिंगो टोलबासी शोकमग्न बनेको व्यास–१ का वडास्दस्य मणिजंग बस्नेतले जानकारी दिए । धेरै राम्रो व्यक्ति गुमाउनु पर्यो,उनले भने,यस्तो दुखद घटना शत्रुलाई पनि नपरोस् ।
#जनचाहना_न्युज
#सन्त_नेपाली
पाखो बारी जोत्ने क्रममा टयाक्टर दुर्घटनामा परी २८ बर्षीय दरैको मृत्यु
