गोरखाको सिरानचोकदेखि काठमाडौंसम्म ऐतिहासिक कार्यक्रम, मेची–महाकालीसम्म सहभागिताको आह्वान
गोरखा, साउन १४।
नेपालको एकीकरण अभियानका महान् सेनानी तथा राष्ट्रिय विभूति बडाकाजी अमरसिंह थापाको २९०औँ स्मृति दिवस आगामी साउन १६ गते देशका विभिन्न स्थानमा विविध कार्यक्रमका साथ मनाइने भएको छ। गोरखाको सिरानचोकस्थित जन्मथलोदेखि उहाँले राष्ट्र रक्षाका लागि योगदान पुर्याएका ऐतिहासिक क्षेत्रहरू तथा राजधानी काठमाडौंसहित देशभर स्मृति दिवसका कार्यक्रम आयोजना गरिने भएका छन्।
राष्ट्रिय विभूति अमरसिंह थापा प्रतिष्ठान, काठमाडौं ले स्मृति दिवसको मुख्य कार्यक्रम भद्रकालीस्थित त्रिभुवन आर्मी अफिसर क्लब सभाहल मा आयोजना गर्ने जनाएको छ। कार्यक्रममा नेपालका प्रतिष्ठित इतिहासविद्, अनुसन्धानकर्ता तथा इतिहासकारहरूको सहभागितामा अमरसिंह थापाको राष्ट्रनिर्माण, एकीकरण अभियान, सैन्य नेतृत्व तथा ऐतिहासिक योगदानबारे विशेष अन्तरक्रिया गरिने कार्यक्रम रहेको प्रतिष्ठानले जनाएको छ।
यसै अवसरमा अमरसिंह सर्किट पर्यटन मेची–महाकाली महाअभियान लाई थप प्रभावकारी रूपमा अघि बढाउने विषयमा समेत छलफल गरिनेछ। अभियानले अमरसिंह थापासँग सम्बन्धित ऐतिहासिक स्थलहरूको संरक्षण, प्रवर्द्धन तथा ऐतिहासिक पर्यटन विकासमार्फत राष्ट्रिय गौरवलाई उजागर गर्ने उद्देश्य लिएको छ।
अमरसिंह पर्यटन सर्किट का परिकल्पनाकार तथा राष्ट्रिय संयोजक राम चन्द्र थापा ले जानकारी दिनुभएअनुसार यो अभियानलाई देशव्यापी रूपमा विस्तार गर्दै ऐतिहासिक सम्पदामार्फत राष्ट्रिय एकता र पर्यटन प्रवर्द्धनलाई जोड दिने लक्ष्य राखिएको छ।
प्रतिष्ठानले मेचीदेखि महाकालीसम्म रहेका इतिहासप्रेमी, बुद्धिजीवी, शिक्षाविद्, सुरक्षाकर्मी, विद्यार्थी, सामाजिक अभियन्ता तथा सम्पूर्ण नेपाली नागरिकलाई स्मृति दिवसका अवसरमा आयोजना हुने कार्यक्रममा गरिमामय उपस्थितिका लागि हार्दिक अपिल गरेको छ।
यस वर्षको स्मृति दिवसमा गोरखाको सिरानचोक, काठमाडौं लगायत विभिन्न जिल्लामा श्रद्धाञ्जली सभा, ऐतिहासिक अन्तरक्रिया, विचार गोष्ठी, पुष्पाञ्जली तथा स्मरण कार्यक्रम आयोजना हुने जनाइएको छ। स्थानीय तह, सामाजिक संघसंस्था तथा इतिहास संरक्षणमा सक्रिय विभिन्न निकायहरूले पनि आफ्ना क्षेत्रमा विशेष कार्यक्रम सञ्चालन गर्ने तयारी गरेका छन्।
राष्ट्रिय एकताको प्रतीक तथा अदम्य साहसका धनी अमरसिंह थापाले नेपालको एकीकरण, सीमाको रक्षा र राष्ट्रिय स्वाभिमानको संरक्षणमा पुर्याएको योगदान आज पनि नेपाली इतिहासको स्वर्णिम अध्यायका रूपमा स्मरण गरिन्छ। उहाँको स्मृति दिवसलाई केवल श्रद्धाञ्जलीमा सीमित नराखी नयाँ पुस्तामा राष्ट्रिय इतिहास, देशभक्ति र सांस्कृतिक सम्पदाप्रति जागरण फैलाउने अवसरका रूपमा समेत लिनुपर्नेमा सरोकारवालाहरूले जोड दिएका छन्।
गोरखा संसारले पनि राष्ट्रिय विभूति अमरसिंह थापासँग सम्बन्धित ऐतिहासिक तथ्य, स्मृति दिवसका गतिविधि तथा अमरसिंह सर्किट पर्यटन मेची–महाकाली महाअभियान सम्बन्धी समाचार र विशेष सामग्रीलाई निरन्तर प्राथमिकताका साथ प्रकाशन गर्दै आएको छ।
राष्ट्रिय विभूति अमरसिंह थापाको स्मृति दिवसलाई राष्ट्रिय रूपमा स्थापित गर्न स्थानीय तहदेखि राष्ट्रिय अभियान
राष्ट्रिय विभूति बडाकाजी अमरसिंह थापाको स्मृति दिवसलाई संस्थागत र राष्ट्रिय रूपमा स्थापित गर्न विभिन्न व्यक्ति तथा संस्थाहरूले विगतदेखि निरन्तर पहल गर्दै आएका छन्।
विशेषगरी सिरानचोक गाउँपालिकाका निवर्तमान अध्यक्ष राजु गुरुङको पहलमा अमरसिंह थापाको जन्मथलो रहेको स्थानीय तहमा स्मृति दिवसको महत्वलाई संस्थागत गर्दै सरकारी स्तरबाट सार्वजनिक बिदा दिने व्यवस्था गरिएको थियो। स्थानीय स्तरबाट सुरु गरिएको उक्त पहललाई राष्ट्रिय विभूतिको सम्मानमा गरिएको महत्वपूर्ण निर्णयका रूपमा लिइन्छ।
त्यसैगरी, राष्ट्रिय विभूति अमरसिंह थापा प्रतिष्ठान, काठमाडौंका अध्यक्ष रामचन्द्र थापाले अमरसिंह थापाको स्मृति दिवसलाई राष्ट्रव्यापी रूपमा मनाउने अभियान सञ्चालन गर्दै आउनुभएको छ। उहाँकै सक्रिय पहलमा हरेक वर्ष काठमाडौंसहित देशका विभिन्न स्थानमा ऐतिहासिक अन्तरक्रिया, श्रद्धाञ्जली सभा, विचार गोष्ठी तथा जनचेतनामूलक कार्यक्रम आयोजना हुँदै आएका छन्। साथै, “अमरसिंह सर्किट पर्यटन मेची–महाकाली महाअभियान” मार्फत अमरसिंह थापासँग सम्बन्धित ऐतिहासिक स्थलहरूको संरक्षण, प्रवर्द्धन तथा राष्ट्रिय पर्यटनसँग जोड्ने अभियानलाई पनि निरन्तरता दिइएको छ।
यस वर्षको २९०औँ स्मृति दिवस पनि गोरखाको सिरानचोकदेखि काठमाडौंसम्म तथा देशका विभिन्न जिल्लामा विविध कार्यक्रमका साथ मनाइँदैछ। आयोजकहरूले सम्पूर्ण नेपाली नागरिकलाई कार्यक्रममा सहभागी भई राष्ट्रिय विभूतिप्रति सम्मान व्यक्त गर्न हार्दिक आग्रह गरेका छन्।
