काठमाडौं । अमेरिका, क्यानडा र मेक्सिकोमा संयुक्त रूपमा भइरहेको फिफा विश्वकप २०२६ अन्तिम चरणतर्फ प्रवेश गरिरहेको छ। ४८ टोलीको सहभागितासहित पहिलो पटक आयोजना भएको यस संस्करणले दर्शक, डिजिटल पहुँच र खेलको रोमाञ्चका हिसाबले नयाँ कीर्तिमान कायम गरेको छ।
विश्व फुटबल महासंघ (फिफा) का अनुसार राउन्ड अफ–१६ समाप्तिसँगै प्रतियोगिताले अभूतपूर्व सफलता हासिल गरेको छ। हालसम्म ६२ लाखभन्दा बढी दर्शकले रंगशालाबाट प्रत्यक्ष खेल हेरेका छन् भने फिफाका डिजिटल प्लेटफर्महरूमा २० अर्बभन्दा बढी भिडियो हेरिएको तथ्यांक सार्वजनिक गरिएको छ।
यसैबीच, अर्जेन्टिनाले इजिप्टलाई ३–२ गोलअन्तरले पराजित गरेपछि रेफ्रीको निर्णयलाई लिएर विवाद चर्किएको छ। इजिप्टले रेफ्रीमाथि पक्षपात गरेको आरोप लगाए पनि फिफाका प्रमुख रेफ्री अधिकारी पियरलुइजी कोलिनाले सबै निर्णय नियमअनुसार भएको स्पष्ट पारेका छन्। उनले भिएआर प्रणाली निष्पक्ष र स्वतन्त्र रहेको बताएका छन्।
प्रतियोगितामा इंग्ल्यान्ड क्वार्टरफाइनलमा प्रवेश गरिसकेको छ र अब उसले नर्वेको सामना गर्नेछ। यस संस्करणमा ४८ टोली सहभागी भएकाले कुल १०४ खेल समावेश गरिएको छ, जुन विश्वकप इतिहासकै सबैभन्दा ठूलो संरचना हो।
फुटबलसँगै मनोरञ्जनमा पनि यसपटक विश्वकपले नयाँ अध्याय सुरु गर्ने भएको छ। फिफाले पहिलो पटक फाइनल खेलको मध्यविराममा सुपर बाउल शैलीको विशेष सांगीतिक कार्यक्रम आयोजना गर्ने घोषणा गरेको छ। कार्यक्रममा जस्टिन बिबर, शकिरा, म्याडोना र बीटीएसजस्ता विश्वप्रसिद्ध कलाकारहरूको प्रस्तुति रहने जनाइएको छ।
फिफाले प्रतियोगिता अहिले क्वार्टरफाइनल चरणमा प्रवेश गरिसकेको जनाएको छ। विश्वभरका समर्थकहरूको ध्यान अब उपाधि भिडन्ततर्फ केन्द्रित भएको छ।
