पाइलटको मृत्यु, १३ जना घाइते, भिडियो हटाइयो, साना विमानको उडान रोकियो—बेइजिङको कडा हवाई सुरक्षा प्रणालीमाथि गम्भीर प्रश्न उठ्दै।
बेइजिङ। चीनको राजधानी बेइजिङस्थित १०९ तले सिटिक (CITIC) टावरमा सानो विमान ठोक्किएको चार दिन बितिसक्दा पनि दुर्घटनाको वास्तविक कारण सार्वजनिक भएको छैन। घटनामा विमानका पाइलटको मृत्यु भएको छ भने जमिनमा रहेका १३ जना घाइते भएका छन्।
चीन सरकारले हालसम्म राज्य सञ्चालित बेइजिङ डेली मार्फत करिब ६० शब्दको संक्षिप्त विवरण मात्रै सार्वजनिक गरेको छ। त्यसयता घटनाबारे कुनै विस्तृत जानकारी दिइएको छैन। दुर्घटनापछि टावरमा परेको क्षतिको भाग छोपिएको छ भने सामाजिक सञ्जालमा भाइरल भएका भिडियो र तस्बिरहरू हटाइएको बीबीसीले जनाएको छ।
बीबीसीका अनुसार कम्तीमा तीनवटा उड्डयन कम्पनीलाई साना विमानको उडान अस्थायी रूपमा रोक्न निर्देशन दिइएको छ। ती कम्पनीहरूले सरकारी निर्देशनका कारण यस विषयमा सार्वजनिक रूपमा बोल्न नमिल्ने बताएका छन्।
यो दुर्घटना चीनको शीर्ष राजनीतिक केन्द्र झोङनानहाइ नजिकै भएकोले सुरक्षा प्रणालीमाथि गम्भीर प्रश्न उठेको छ। बेइजिङको केन्द्रभागमा करिब १०० वर्ग किलोमिटर क्षेत्र स्थायी रूपमा नो–फ्लाइ जोन रहेको छ। यस्तो क्षेत्रमा एउटा सानो विमान प्रवेश गर्न सफल हुनु सुरक्षा निकायका लागि ठूलो चुनौतीका रूपमा हेरिएको छ।
विश्लेषकहरूका अनुसार दुर्घटना पाइलटको त्रुटि, प्राविधिक खराबी वा जानाजानी गरिएको कार्यमध्ये कुनै पनि कारणले भएको हुन सक्छ। तर आधिकारिक अनुसन्धान प्रतिवेदन सार्वजनिक नभएसम्म कुनै निष्कर्षमा पुग्न सकिने अवस्था छैन।
फ्लाइटराडार–२४ का अनुसार दुर्घटनामा परेको विमान चिनियाँ कम्पनी सनवार्ड एयरक्राफ्टले उत्पादन गरेको दुई सिटे, एक इन्जिनयुक्त Aurora SA60L मोडलको थियो। यो विमान सामान्यतया मनोरञ्जनात्मक उडान, हवाई फोटोग्राफी तथा प्रशिक्षणका लागि प्रयोग गरिन्छ।
दुर्घटनापछि चीनमा सूचना नियन्त्रण पनि कडा पारिएको छ। घटनासँग प्रत्यक्ष सम्बन्ध नभएका सिटिक टावरका पुराना तस्बिर, भिडियो र सामाजिक सञ्जालमा पोस्ट गरिएका सामग्रीसमेत हटाइएको बताइएको छ। डिजिटल मामिलाका विश्लेषकहरूले सरकारले दुर्घटनाको वास्तविक कारण स्पष्ट नभएसम्म सूचना प्रवाह नियन्त्रण गर्न खोजेको हुन सक्ने बताएका छन्।
अन्तर्राष्ट्रिय सुरक्षा विश्लेषकहरूले यो घटनालाई चीनको हवाई सुरक्षा प्रणालीका लागि ठूलो चेतावनीका रूपमा व्याख्या गरेका छन्। कतिपयले सन् १९८७ मा जर्मन युवा पाइलट माथियास रस्टले सोभियत संघको सुरक्षा छलेर मस्कोको रेड स्क्वायरमा विमान अवतरण गराएको घटनासँग तुलना गर्दै यस दुर्घटनापछि पनि सुरक्षा निकायभित्र जिम्मेवारी निर्धारण हुन सक्ने आकलन गरेका छन्।
दुर्घटनाको वास्तविक कारण र सम्भावित सुरक्षा कमजोरीबारे चीन सरकारले विस्तृत जानकारी कहिले सार्वजनिक गर्छ भन्ने विषय अहिले अन्तर्राष्ट्रिय चासोको केन्द्र बनेको छ।
