तनहु ,१९ पुस ।
तनहुँ क्षेत्र नं २ का सांसद शंकर भण्डारी मतदातालाई धन्यवाद दिन घिरिङ पुगेका छन् ।
सांसद भण्डारीले मंगलबार घिरिङको मनफा , कामधेनु , साबुङ,पुर्कोट जितपुर र करुवाटारका मतदातालाई धन्यवाद दिएका छन् । धन्यवाद ज्ञापन कार्यक्रममा सांसद भण्डारीले क्षेत्र नं २ का मतदाताले दिएको जिम्मेवारी पुरा गर्ने प्रतिवद्धता जाहेर गरेका छन् । कांग्रेस प्रतिपक्षमा पुग्दै गर्दा मतदाताहरुलाई विकास निर्माणका योजना आउँदैन कि भनेर एक किसिमको चिन्ता जाहेर गरेको हुँदा कुनै चिन्ता नलिन आग्रह गरेका छन् ।
आफूलाई विकास निर्माणका योजना ल्याउन कांग्रेस सरकारमा जान अपरिहार्य नरहेको सांसद भण्डारीको भनाई थियो ।“सिंहदरबार मैले राम्ररी चिनेको छु , कहाँबाट विकास निर्माणका योजना ल्याउनु पर्छ राम्ररी थाहा छ ।”भण्डारीले भने । पूर्वमन्त्री समेत रहेका भण्डारीले क्षेत्र नं २ मा विकास निर्माणका योजनाको कमि हुन नदिने प्रतिवद्धता समेत जाहेर गरेका थिए । त्यस्तै प्रदेश सांसद एवं नेपाली कांग्रेस तनहुँका सभापति जीतप्रकाश आलेले घिरिङको विकासमा कांग्रेस प्रतिवद्ध रहेको बताएका थिए । सो अवसरमा नेपाली कांग्रेस तनहुँका उपसभापति राजेन्द्रकृष्ण श्रेष्ठ ,क्षेत्रीय सभापति चुडामणि खनाल , क्षेत्रीय सचिव सन्तोष घिमिरे लगायतले बोलेका थिए ।
