चितवन, जेठ — बागमती प्रदेश सरकारले आगामी आर्थिक वर्षको बजेटलाई उद्योग तथा लगानीमैत्री बनाउने तयारी तीव्र पारेको छ। प्रदेशका मुख्यमन्त्री इन्द्रबहादुर बानियाँले निजी क्षेत्रसँग सहकार्य गर्दै उत्पादनमूलक उद्योगलाई प्राथमिकता दिने नीति अघि सारिने स्पष्ट गर्नुभएको छ।
चितवनस्थित प्रिफ्याव प्यानल नेपाल प्रालिको अनुगमनपछि सञ्चारकर्मीहरूसँग कुरा गर्दै मुख्यमन्त्री बानियाँले प्रदेशको आर्थिक विकासको आधार औद्योगिक विस्तार नै भएको उल्लेख गर्नुभयो। उहाँका अनुसार नयाँ बजेटमा व्यवसाय प्रवर्द्धन, लगानी आकर्षण र रोजगारी सिर्जनालाई केन्द्रमा राखिनेछ।
मुख्यमन्त्री बानियाँले वातावरणमैत्री तथा पर्यापर्यटनसँग जोडिएका २५ करोड रुपैयाँभन्दा कम लगानीका उद्योगलाई बैंक ब्याजमा ५० प्रतिशतसम्म अनुदान दिने कार्यक्रम कार्यान्वयन चरणमा रहेको जानकारी दिनुभयो। सहुलियतपूर्ण कर्जामार्फत साना तथा मझौला उद्योगलाई विस्तार गर्ने नीति प्रदेश सरकारले अघि बढाइरहेको उहाँले बताउनुभयो।
ऊर्जा क्षेत्रलाई उत्पादनसँग प्रत्यक्ष जोड्ने रणनीतिमा सरकार रहेको उल्लेख गर्दै उहाँले उद्योगहरूको दीगो विकासका लागि पूर्वाधार र ऊर्जा व्यवस्थापनलाई सँगै लैजाने योजना रहेको स्पष्ट गर्नुभयो।
यसैबीच, निर्माण क्षेत्रमा आधुनिक प्रविधिको प्रयोगलाई विस्तार गर्ने उद्देश्यसहित प्रिफ्याव प्यानल नेपाल प्रालिले “स्मार्ट प्यानल” प्रविधिलाई नेपाली बजारमा विस्तार गर्दै आएको छ। कम्पनीले छिटो निर्माण, लागत घटाउने र वातावरणमैत्री संरचना निर्माण गर्ने लक्ष्यसहित EPS Cement/Calcium Based Smart Panel उत्पादन गर्दै आएको जनाएको छ।
सन् २०२४ मा स्थापना भएको उक्त कम्पनीको अधिकृत पूँजी १० करोड रुपैयाँ रहेको छ। कम्पनीका अध्यक्ष नारायण रेग्मीका अनुसार छोटो समयमा नै नेपालका ५० भन्दा बढी जिल्लामा उत्पादनहरूको वितरण विस्तार भइसकेको छ।
कम्पनीले EPS Based Lightweight Blocks र EPS Based Net Panel समेत उत्पादन गर्दै निर्माण क्षेत्रलाई अझ आधुनिक, हलुका र दिगो बनाउने प्रयास गरिरहेको जनाएको छ।
निर्माण व्यवस्थापन विज्ञ बिमलराज गोसाई र उद्यमी मोतिना चन्दको नेतृत्वमा सञ्चालित कम्पनीले आगामी दिनमा उत्पादन क्षमता विस्तार गर्दै ५० करोड रुपैयाँसम्म लगानी पुर्याउने लक्ष्य लिएको छ। साथै निकट भविष्यमा आईपीओ जारी गर्ने तयारी समेत अघि बढाइएको कम्पनीले जनाएको छ।
सरकारी नीतिको उद्योगमैत्री दृष्टिकोण र निजी क्षेत्रको नवप्रवर्तनबीचको सहकार्यले बागमती प्रदेशमा औद्योगिक विकास र आधुनिक निर्माण प्रविधिको विस्तारलाई नयाँ गति दिने अपेक्षा गरिएको छ।
