काठमाडौँ, जेठ १४
विगत लामो समयदेखि सहकारीमा जम्मा गरेको रकम डुब्ने चिन्तामा रहेका साना बचतकर्ताहरूका लागि राहतको खबर छ। समस्याग्रस्त सहकारी व्यवस्थापन समितिले थप ३०४ जना साना बचतकर्ताहरूको बचत रकम फिर्ता गरेको छ।
समितिका अनुसार आज दुईवटा समस्याग्रस्त सहकारीका बचतकर्ताहरूलाई रकम वितरण गरिएको हो। जसमा कृषि सहकारीका ८८ जना र शिव शिखर बहुउद्देश्यीय सहकारीका २१६ जना बचतकर्ताहरू रहेका छन्।
६८२ जनाले पाए न्याय
यसअघि समितिको सक्रियतामा ३७८ जना बचतकर्ताले आफ्नो रकम फिर्ता पाइसकेका थिए। आज थपिएका ३०४ जनासँगै हालसम्म कुल ६८२ जना बचतकर्ताहरूले आफ्नो मिहिनेतको कमाइ फिर्ता पाउन सफल भएका छन्।
पहिलो चरणमा साना बचतकर्तालाई प्राथमिकता
समितिले हाल पहिलो चरण अन्तर्गत ५ लाख रुपैयाँभन्दा कम बचत भएका साना बचतकर्ताहरूलाई प्राथमिकतामा राखेर रकम फिर्ता गरिरहेको जनाएको छ। ठूला बचतकर्ताको तुलनामा साना बचतकर्ताहरू बढी मर्कामा पर्ने भएकाले यो नीति लिइएको समितिले प्रष्ट पारेको छ।
“बचतकर्ताहरूको रकम सुरक्षित रूपमा फिर्ता गर्ने प्रक्रिया निरन्तर अघि बढाइनेछ। हामी क्रमशः अन्य बचतकर्ताहरूको पनि रकम फिर्ता गर्दै जानेछौँ।”
— समस्याग्रस्त सहकारी व्यवस्थापन समिति
सहकारी संकटका कारण मारमा परेका नागरिकहरूलाई सरकार र व्यवस्थापन समितिको यो कदमले ठूलो भरोसा दिलाएको छ। बाँकी रहेका अन्य बचतकर्ताहरूको रकम पनि छिटोभन्दा छिटो फिर्ता गर्न समितिले आफ्नो प्रक्रियालाई तीव्र बनाएको छ।
श्राेतः अर्थ समाचार
