गोरखा । सामाजिक सञ्जालमा भाइरल हुने धेरै ठाउँ केही समय चर्चा कमाएपछि फेरि ओझेलमा पर्ने गर्छन् । तर गोरखाको एक भाइरल गन्तव्यमा भने दुई युवाले फरक सन्देश दिएका छन्—“भाइरलभन्दा महत्वपूर्ण संरक्षण हो ।”
पालुङटार नगरपालिका–७ च्याङ्ली स्थित बगरमा रहेको चर्चित घाँसे मैदान पछिल्लो समय टिकटक, फेसबुक लगायत सामाजिक सञ्जालमा निकै भाइरल बनिरहेको छ । हरियाली मैदान, प्राकृतिक दृश्य र खुला वातावरणका कारण दैनिकजसो आन्तरिक पर्यटक तथा घुम्न जाने युवाहरूको भीड लाग्ने गरेको छ ।
तर पर्यटकको चहलपहल बढेसँगै फोहोर व्यवस्थापन चुनौती बन्दै गइरहेका बेला स्थानीय दुई युवा सुरज बिक र सञ्जिव ढकालले उदाहरणीय सक्रियता देखाएका छन् ।
उनीहरूले व्यक्तिगत पहलमै घाँसे मैदान क्षेत्रमा फोहोर व्यवस्थापनका लागि ५ थान डस्टबिन सहयोग गरेका छन् ।
‘भाइरल क्षणिक हुन्छ, विकास दिगो हुनुपर्छ’
युवामध्येका सुरज बिक भन्छन्, “आजकाल धेरै ठाउँ केही समय भाइरल हुन्छन्, पछि विस्तारै हराउँछन् । तर यदि यहाँ पूर्वाधार विकास, सरसफाइ र दीर्घकालीन योजना बनाउन सकियो भने यो ठाउँ दिगो पर्यटन गन्तव्य बन्न सक्छ ।”
उनले स्थानीय, प्रदेश र संघीय सरकारबीच सहकार्य गरेर पर्यटन पूर्वाधार निर्माण गर्नुपर्ने आवश्यकता पनि औँल्याए ।
पर्यटनसँगै चेतनाको सन्देश
स्थानीयका अनुसार पछिल्लो समय सामाजिक सञ्जालका कारण ओझेलमा रहेका ग्रामीण गन्तव्यहरू चर्चामा आउन थालेका छन् । तर संरक्षण र व्यवस्थापनमा ध्यान नदिँदा धेरै ठाउँ फोहोर, अव्यवस्थित र जोखिमपूर्ण बन्दै जाने खतरा पनि बढिरहेको छ ।
युवाहरूको यो पहलले पर्यटन भनेको केवल फोटो खिच्ने वा भिडियो बनाउने विषय मात्र नभई संरक्षण र जिम्मेवारीसँग पनि जोडिएको सन्देश दिएको स्थानीयवासी बताउँछन् ।
‘फोटो मात्रै होइन, फोहोर पनि उठाऔं’ अभियानको आवश्यकता
विशेषगरी टिकटक र फेसबुकका कारण प्राकृतिक गन्तव्यमा जाने युवाको संख्या बढ्दो छ । तर फोहोर व्यवस्थापन, शौचालय, सुरक्षा र पूर्वाधारको अभावले धेरै पर्यटकीय क्षेत्र समस्यामा पर्न थालेका छन् ।
यस्तो अवस्थामा च्याङ्लीका युवाहरूले देखाएको पहललाई “सामाजिक उत्तरदायित्वको सकारात्मक उदाहरण” का रूपमा हेरिएको छ ।
स्थानीयहरू अब उक्त क्षेत्रमा थप डस्टबिन, बस्ने ठाउँ, सूचना बोर्ड तथा संरक्षण अभियान सञ्चालन गर्नुपर्ने माग गर्न थालेका छन् ।
भाइरल बनेको ठाउँ जोगाउन स्थानीय सक्रियता कति आवश्यक हुन्छ भन्ने उदाहरण अहिले च्याङ्लीको घाँसे मैदानले देखाइरहेको छ ।
