रोल्पा । जलजलामा आज भएको दर्दनाक जिप दुर्घटनामा हालसम्म १७ जनाको मृत्यु भएको प्रहरीले जनाएको छ।
प्रहरीका अनुसार रूकुम पूर्व बाट जलजलातर्फ जाँदै गरेको जिप अचानक सडकबाट अनियन्त्रित भई करिब ८ सय मिटर तल भीरमा खसेको हो। दुर्घटना अत्यन्त भीषण भएकाले अधिकांश यात्रुको घटनास्थलमै मृत्यु भएको प्रारम्भिक जानकारी आएको छ।
दुर्घटनापछि स्थानीय बासिन्दा, प्रहरी तथा सुरक्षाकर्मी उद्धार कार्यमा खटिएका छन्। दुर्गम भूगोल र कठिन भिरालो क्षेत्रका कारण उद्धार कार्य चुनौतीपूर्ण बनेको बताइएको छ।
घटनास्थलमा अहिले पनि उद्धार तथा खोजी कार्य जारी रहेको प्रहरीले जनाएको छ। घाइतेहरूको संख्या र मृतकको पहिचान खुल्ने क्रम जारी छ।
दुर्घटनापछि सिंगो गाउँ शोकमा डुबेको छ। चाडपर्व र पारिवारिक भेटघाटका लागि यात्रा गरिरहेका सर्वसाधारण एकैपटक यस्तो दुर्घटनामा परेपछि स्थानीयवासी स्तब्ध बनेका छन्।
प्रहरीले दुर्घटनाको कारणबारे थप अनुसन्धान भइरहेको जनाएको छ।
