आँबुखैरेनी ।
तनहुँको आँबुखैरेनी गाउँपालिका वडा नं. ४ बेनिटारबाट मंगलबार दिउँसो प्रहरीले लागुऔषध सहित १ जना पक्राउ गरेको छ । दिउँसो २ः३० बजेको समयमा पृथ्वीराजमार्ग सडक–खण्डको अस्थायी प्रहरी पोष्ट मुग्लिङ्ग पुलजिपको चेकपोष्टमा चेकजाँचका क्रममा बाग्लुङ काठेखोला गाउँपालिका वडा न. ४ का वर्ष २२ को नर बहादुर थापालाई लागुऔषध सहित पक्राउ गरिएको प्रहरीले बताएको छ।
सुनौलीबाट पोखरा तर्फ आउदै गरेको ग. २ ख. ९९५ न. को यात्रुबाहक बस रोकी चेकजाँच गर्ने क्रममा उक्त बसमा सवार थापाले बोकी ल्याएको खैरो झोला भित्र लुकाई छिपाई राखिएको अवस्थामा नुफिन ६८ एम्पुल, फेनरागन ६९ एम्पुल र डाईजेपाम ६९ एम्पुल गरी जम्मा २०६ एम्पुल लागुऔषध फेला नियन्त्रणमा लिएको इलाका प्रहरी कार्यालय आँबुखैरेनीले जानकारी दिएको छ ।
प्रहरीले लागुऔषध सहित थापालाई पक्राउ गरी जिल्ला अदालतबाट लागूऔषध नियन्त्रण ऐन, २०३३ बमोजिमको कसुरमा म्याद थप गरी अनुसन्धान कार्य गरिरहेको छ ।
