आठौं संविधान दिवस २०७९ को पावन आवसरमा भएको अन्तर मा.वि. स्तरीय हाजिरी जवाफ प्रतियोगितामा अमर ज्योती जनता माध्यमिक विद्यालय प्रथम भएको छ ।
भवानी बहुमुखी क्याम्पस पालुङटार ५ ठाँटिपोखरीले आयोजना गरेको प्रतियोगितामा पालुङटार नगरपालिका, सिरानचाेक गाउँपालिका, राइनास नगरपालिका र तनहुँका गरी १५ विद्यालय सहभागी थिए । उक्त प्रतियोगितामा अमर ज्योती जनता मा.वि. १५५ अंकको साथमा प्रथम भएको भवानी बहुमुखी क्याम्पसका अतिरिक्त कार्यक्रम संयोजक किरण गिरीले बताउनु भयो ।
प्रतियोगितामा पहिलो चरणबाट उत्कृष्ट ८ विद्यालयलाई सेमिफाइनलमा लगिएको र सेमिफाइनलबाट उत्कृष्ट ४ लाई फाइनलमा लगिएको संयोजक गिरीले जनाकारी दिनु भयो । कार्यक्रमका प्रमुख अतिथी पालुङटार नगरपालिकाका नगर प्रमुख विवश चिन्तनले प्रथम हुने अमर ज्योती जनता माध्यमिक विद्यालयलाई नगद रु ६ हजार सहित शिल्ड र प्रमाणपत्र प्रदान गर्नु भएको थियो । त्यस्तै प्रतियोगितामा ६५ अंकको साथमा जनता माध्यमिक विद्यालय आँपपिलले द्धितृय स्थान हाँसिल गरेको छ, उसले नगद रु ४ हजार ५ सय सहित प्रमाणपत्र प्राप्त गरेको छ ।
प्रतियोगिताको तृतिय स्थान ४५ अंकको साथमा अकला माध्यमिक विद्यालय धुँवाकोट रहेको थियो । धुँवाकोटले नगद रु ३ हजार सहित प्रमाणपत्र प्राप्त गरेको छ । त्यस्तै प्रतियोगितामा ज्ञानोदय माध्यमिक विद्यालय साँहिलीटारले ३५ अंकको साथमा सान्त्वना स्थान हाँसिल गरेको छ । साँहिलीटारलाई नगद रु १ हजार ५ सय सहित प्रमाणपत्र प्रमुख अतिथी विवश चिन्तनले वितरण गर्नु भएको थियो ।
कार्यक्रममा बोल्दै प्रमुख अतिथी विवश चिन्तनले करिब करिब हराइसकेको हाजिरी जवाफ प्रतियोगिता गरेको प्रती खुसी व्यक्त गर्दै भवानी बहुमुखी क्याम्पसलाई धन्यवाद ज्ञापन गर्नु भयो । उहाँले अहिलेका विद्यार्थीहरु सामाजिक सञ्जालमा र गेम खेल्नमा मात्र रम्ने गरेको भन्दै पढाइको स्तर खस्केकोमा दुःख व्यक्त गर्नु भयो । उहाँले पालिका भित्रका जेहेन्दार र मिहेनेती विद्यार्थीहरु जो केही यदि पढ्न नपाएर बसेको भए नगरपालिका र आफ्नो व्यक्तिगत सहयोग गरेर समेत पढ्न बाट बँञ्चीत हुनु नपर्ने बताउनु भयो ।
त्यस्तै कार्यक्रमका विशेष अतिथी भवानी बहुमुखी क्याम्पसका संस्थापक अध्यक्ष जुद्धविलास भण्डारीले कार्यक्रममा बोल्दै अब विद्यार्थीहरु किताबी किरोमात्र हुन नहुने जिकिर गर्नु भयो । उहाँले विद्यार्थीहरु अतिरिक्त कृयाकलापहरुमा पनि पढाइ सँगसँगै जोडिनु पर्नेमा जोड दिनु भयो । भवानी बहुमुखी क्याम्पसलाई सबै मिलेर पालुङटारकै शैक्षिक धरोहर बनाउनका निम्ती पनि आग्रह गर्नु भयो ।
कार्यक्रमको सभापति भवानी बहुमुखी क्याम्पसका अध्यक्ष प्रकाश खनाल रहनु भएको कार्यक्रममा क्याम्पस प्रमुख चेतनाथ पन्त, विद्यार्थी तथा सहभागी विद्यालयका शिक्षकहरुले मन्तव्य राख्नु भएको भएको थियो ।
भवानी बहुमुखी क्याम्पसका साहायक क्याम्पस प्रमुख बिष्णु आचार्यले स्वागत मन्तव्य राख्नु भएको कार्यक्रमको संञ्चालन क्याम्पसका साहायक क्याम्पस प्रमुख पिताम्बर देवकोटाले गर्नु भएको थियो ।
भवानी बहुमुखी क्याम्पसले आयोजना गरेको कार्यक्रमको पुरस्कार प्रायोजक साहित्यकार नगेन्द्र न्यौपानेले गर्नु भएको थियो । उहाँ शोभाकर स्मृति प्रतिष्ठान पालुङटार ४ लुइटेल, गोरखाको संरक्षक हुनु हुन्छ ।
