पोखरा । संसारभरका लाखौं पर्यटकले नेपाललाई हिमाल, संस्कृति, तालतलैया र प्राकृतिक सौन्दर्यको देशका रूपमा आफ्नो क्यामेरामा कैद गर्दै आएका छन्। तर अब पहिलो पटक नेपाल आफैंले फोटोग्राफीलाई केन्द्रमा राखेर विश्व समुदायलाई एकै थलोमा जुटाउने ऐतिहासिक पहल गरेको छ।
‘नेपाल फोटो फेस्टिभल २०२६’ नामक यो विशेष कार्यक्रमले नेपाललाई केवल घुम्न आउने गन्तव्य मात्र नभई विश्वस्तरीय दृश्य कथावाचन (भिजुअल स्टोरीटेलिङ) को केन्द्रका रूपमा स्थापित गर्ने लक्ष्य लिएको छ। वर्डप्रेस पोखरा कम्युनिटीको आयोजनामा हुन लागेको यो महोत्सव पोखरा र घान्द्रुकका मनमोहक परिवेशमा सञ्चालन हुनेछ।
“हरेक फ्रेम, हरेक कथा, हरेक आत्मा” भन्ने मूल भावनासहित आयोजना गरिएको महोत्सवले नेपालका हिमाल, नदी, ताल, संस्कृति, परम्परा र जनजीवनका अनगिन्ती कथाहरूलाई विश्वसामु प्रस्तुत गर्ने उद्देश्य राखेको छ।
महोत्सवको उद्घाटन कार्यक्रम मे १६ मा पोखरामा हुनेछ भने समापन कार्यक्रम जुन १३ मा अन्नपूर्ण हिमश्रृंखलाको काखमा अवस्थित घान्द्रुकमा आयोजना गरिनेछ। समापन समारोहमा उत्कृष्ट तस्बिरहरूको घोषणा, सम्मान तथा सहभागीसँग अन्तरक्रियाका कार्यक्रमहरू समावेश गरिएका छन्।
आयोजकका अनुसार यो महोत्सव केवल सुन्दर तस्बिर खिच्ने प्रतियोगिता मात्र होइन, सिर्जनात्मक प्रतिभालाई उजागर गर्ने, अनुभव आदान–प्रदान गर्ने र विश्वभरका फोटोग्राफर तथा सिर्जनाकर्मीबीच सम्बन्ध विस्तार गर्ने साझा मञ्च हो।
महोत्सवमा नेपालसहित विभिन्न देशका फोटोग्राफर, भिजुअल आर्टिस्ट, शिक्षक, विद्यार्थी, यात्रा प्रेमी तथा कथावाचकहरू सहभागी हुने अपेक्षा गरिएको छ। सहभागीहरूले अनुभवी फोटोग्राफरहरूबाट सिक्ने, आफ्ना सिर्जना प्रदर्शन गर्ने तथा अन्तर्राष्ट्रिय सञ्जाल निर्माण गर्ने अवसर प्राप्त गर्नेछन्।
आयोजकको विश्वास छ कि नेपाल फोटो फेस्टिभल २०२६ ले नेपालको प्राकृतिक र सांस्कृतिक सम्पदाको अन्तर्राष्ट्रिय प्रवर्द्धनमा महत्वपूर्ण योगदान पुर्याउनेछ। साथै, खुला दृश्य अभिलेख (ओपन भिजुअल आर्काइभ) निर्माणमार्फत नेपालका कथा, संस्कृति र पहिचानलाई दीर्घकालीन रूपमा विश्वसामु सुरक्षित राख्न मद्दत पुग्नेछ।
पर्यटन, संस्कृति र सिर्जनात्मक क्षेत्रलाई एकै सूत्रमा बाँध्ने यो महोत्सव नेपालमा फोटोग्राफीको इतिहासमा नयाँ अध्यायका रूपमा हेरिएको छ।
