दमौली २० कार्तिक
समग्र जिल्लाको शान्ति सुरक्षा,अमन्चय कायम र सेवा प्रवाहमा सुशासन,पारदर्शिता गर्ने निकाय जिल्ला प्रशासन कार्यालय तनहुँका केही कर्मचारी र सेवाग्राही बीच मिलोमतोमा काम हुने गरेको खुलसा बाहिरीएको छ ।कार्यालयका केही कर्मचारीको सेटिङ्गमा पसलको नाउँ नै तोकेर मोबाइल नम्बरसहितको चिट पठाउने बिकृती बढेको भन्दै असन्तुष्ट व्यवसायीहरुले सत्यतथ्य छानबिन र कारबाहीको माग गरेका हुन् ।
स्याङ्गजा जिल्लाका सेवाग्राहीलाई असर पर्ने गरी फर्म भरेर तनहुँमा बायोमेट्रिक गर्ने गरेको बुधबार जिल्ला प्रशासन कार्यालयमा पुगेका व्यवसायीहरुले प्रमाणसहित सहायक प्रजिअ दीपक रेग्मीलाई पेश गरेका हुन् । व्यवसायी घर गइसकेपछि सीमित व्यक्तिका लागि प्रशासन कार्यालयबाट राहदानी फर्म भर्नका लागि अनलाइन सुविधा दिने गरेको फोटो व्यवसायी संघका सदस्य संजय गुरुङ्गले जानकारी दिनुभयो ।
बुधबार मात्रै टोकन नखुलेका दिन समेत राहदानी फर्म भर्ने सुविधा दिइएको व्यवसायीको आरोप छ । नियमित ५ र ६ तारिख नभई एकैचोटी ७ तारिखसम्मको अग्रिम फर्म भर्न अनलाइन मिति दिइने गरेको सदस्य गुरुङ्गले बताउनुभयो । प्रशासनका कर्मचारीको मिलोमतोमा सुप्रिम फोटो र साझा पुस्तक पसलको नाउँ र मोबाइल नम्बरसहितको चिट दिएर पठाउने गरेको प्रमाणसहित सहायक प्रजिअ समक्ष व्यवसायीले पेश गरेका थिए ।
सबै नागरिक र व्यवसायीले सुविधा पाउने गरी कार्यालयबाट सेवा प्रवाह गरिनुपर्ने माग आम व्यवसायीको रहेको व्यवसायी प्रेम आलेले बताउनुभयो । यहाँ केही सीमित व्यक्तिलाई सुविधा दिएर प्रशासन कार्यालयले कालोबजारी मौलाउने काम गरेको उहाँको आरोप छ ।
सहायक प्रजिअ रेग्मीले अबका दिनमा एक हप्तासम्म फर्म भर्न मिल्ने गरी आम नागरिकहरुको सेवा पहुँच पुराउन लागिएको बताउनुभयो । अहिले दिनको ४० जनासम्मको फर्म भर्न सकिने व्यवस्था रहेको प्रशासन कार्यालयले जनाएको छ । कार्यालयको युजर आइडी र पासवोड लिकेज भएको भए त्यस्ता कार्यलाई निरुत्साहित गरिने समेत सहायक प्रजिअ रेग्मीले प्रतिबद्धता जनाउनुभयो। आम नागरिकसम्म सूचनाको पहुँच पुग्ने गरी सेवा दिन सूचना प्रकाशित गरिएको उहाँले बताउनुभयो ।
जनचाहना न्यूज
