गोरखाको गण्डकी गाउँपालिकामा किसानलाइ उत्पादनमा अाधारित अनुदान दिने व्यवस्थाको लागि सफ्टवेयरको प्रयोग गरिएको छ ।
अा.ब. २०८०/०८१ बाट नै यो कार्यक्रम लागु गरेको भए पनि थप व्यवस्थित गर्नको लागि यस बर्षदेखि सफ्टवेयर सञ्चालनमा ल्याएको छ ।
कृषकहरूले बिक्री वितरण गरेको कृषिजन्य उपजहरूको बिवरण दैनिक रूपमा सफ्टवेयरमार्फत अद्यावधिक गरिने र सो को अाधारमा नै अनुदान दिने पालिकाको प्रमुख प्रशासकिय अधिकृत भुवन चापागाईले बताउनुभयो ।
यसअघि हरेक वडाबाट बिक्री बितरण गरिएको लिष्ट ल्याएर इन्ट्री गरी तेसैका अाधारमा अनुदान दिने गर्दा अलिक झन्झट अाएको र सफ्टवेयर मार्फत गर्दा सहज र सजिलो भएको बताइएको छ ।
‘जुन कुनै जातको तरकारीमा केजीको दुई रुपैँया, फलफुलअन्तरगत सुन्तलामा केजीको चार रुपैँया, खाद्यन्न बालीअन्तरगत कोदोमा केजीको पाँच रुपैँया, अण्डा प्रति किरेट पाँच रुपैँया र मासुमा प्रतिकेजी दश रुपैँया अनुदान दिने प्रावधान छ’, प्रमुख प्रशासकिय अधिकृत चापागाईले बताउनुभयो । उत्पादनमा आधारित अनुदान कार्यक्रममा पालिकाभित्रका एक हजार बढी कृषकहरु आवद्ध रहेको उनले जनाकारी दिए । गत वर्ष मात्र यही कार्यक्रममार्फत केही किसानहरुले डेढ लाखसम्म अनुदान पाएको पालिकाको प्रमुख प्रशासकिय अधिकृत चापागाईको भनाई छ ।
यसअघि संचालनमा आएका कृषि अनुदान कार्यक्रमहरु लक्षित वर्गसम्म नपुगेका र ती कार्यक्रमहरुको उचित व्यवस्थापन नहुँदा अनुदानको दुरुपयोग भएकाले उत्पादनमा आधारित कृषि अनुदान कार्यक्रम संचालन गरेको गण्डकी गाउँपालिकाले जनाएको छ ।
