आँबुखैरेनी, १४ कार्तिक ।
तनहुँको आँबुखैरेनी गाउँपालिकाले बजार व्यवस्थित गर्न सडकको (दायाँ–बायाँ) नाला बाहेक ३ मिटर भित्र पैदल मार्ग निर्माण गर्ने भएको छ । यस अघि पैदल मार्ग निर्माणका लागि गाउँपालिकाले आँबुखैरेनी चोक देखि पालिकाको कार्यालय सम्म र आँबुखैरेनी चोक देखि तल्लो बजार सम्म सडकको नाला बाहेक ३ मिटर भित्र पर्ने संरचना हटाउन, निर्माण कार्य बन्द गर्न, ठेला गाडा हटाउन लगायत अन्य संरचना हटाउन ३५ दिने सूचना जारी गरेको थियो । ३५ दिने सूचना सकिए लगतैं सो क्षेत्रमा पर्ने सडकमा पैदल मार्ग निर्माण गरी बजार व्यवस्थित गर्न आज सोमबार रेखाङ्कन गरिएको छ । बजार क्षेत्रलाई व्यवस्थित गर्न, सडक दुर्घटना न्यूनिकरण गर्न, बजार क्षेत्रलाई सफा तथा सडक बत्ती र सिसि क्यामेरा जडान गरी सुरक्षित गराउन, सडकको दायाँ बायाँ फुल सहितको गमला राखी सुन्दर र आकर्षित बनाउन पैंदल मार्ग निर्माणको तयारी सुरु गरिएको गाउँपालिकाका अध्यक्ष शुक्र चुमानले बताउनुभएको छ । पालिका अध्यक्ष चुमानले सडकको ३ मिटर क्षेत्रमा पर्ने विभिन्न स्थायी तथा अस्थायी संरचनालाई यथा शिघ्र हटाई पैदल मार्ग निर्माण कार्यमा सहयोग गर्न स्थानीय व्यापारीहरुलाई आग्रह गर्नुभएको छ ।
Facebook Comments Box
