पालुङ्टारमा गाउँघर आयुर्वेद स्वास्थ्य क्लिनिक सञ्चालन

माघ १५, गोरखा ।
गोरखाको पालुङ्टार नगरपालिका वडा नं. ७ मा आज गाउँघर आयुर्वेद स्वास्थ्य क्लिनिक सञ्चालन गरिएको छ । राष्टिय मौलिक चिकित्साको रुपमा रहेको आयुर्वेद उपचार पद्धती दूर दराजमा रहेको जनताको पहुँचमा पुर्याउने उदेश्यका साथ नगरपालिकाको आर्थिक सहयोगमा सञ्चालित क्लिनिक आयुर्वेद शाखा पालुङ्टारका प्रमुख हितकाजी श्रेष्ठको अध्यक्षतामा सम्पन्न भएको थियो ।
कार्यक्रममा प्रमुख अतिथिको रुपमा बोल्दै वडा नं. ७ का वडाध्यक्ष वसन्त कुमार श्रेष्ठले आयुर्वेद स्वास्थ्यमा मानिसहरुको पहुँच पुर्याउन सकेमा बढी प्रभावकारी हुने कुरामा जोड दिनुभएको थियो ।
च्याङ्ली स्वास्थ्य चौकीका इन्चार्ज भरतराज पाण्डेले कार्यक्रममा स्वागत मन्तव्य राख्नुभएको सो कार्यक्रममा ५० भन्दा बढी व्यक्तिहरुको स्वास्थ्य जाँच गरी आयुर्वेदिक औषधी निशुल्क रुपमा बितरण गरिएको थियो ।
नगरपालिकाको वडा नं. २ चापाभञ्ज्याङमा गत महिनादेखि नै हरेक महिनाको पहिलो र तेश्रो विहीवार क्लिनिक शुरु गरिसकिएको छ भने वडा नं. ७ मा हरेक महिना दोश्रो र चौथो बिहिबार नियमित रुपमा सञ्चालन गरिने कार्यक्रम रहेको आयुर्वे शाखा प्रमुख श्रेष्ठले बताउनुभयो ।
मानिसमा आएको फरक जीवनशैली, आहारविहार, जल जमिन तथा वायु प्रदूषण जस्ता कारणले ६३ प्रतिशत मानिसहरु नसर्ने रोगबाट आक्रान्त बनेका छन् । आयुर्वेद चिकित्साको मेरुदण्डको रुपमा रहेको पञ्चकर्म, वमन, विसेचन, रक्तमोक्षण तथा योगद्धारा विभिन्न रोगहरुबाट मुक्त हुन सकिने आयुर्वेदकर्मीहरुको दावी रहेको छ । यस अवस्थामा हाम्रै घर आँगन, बारी कान्ला तथा प्रकृतिमा रहेका जडिबुटीहरुबाट स्वास्थ्य समस्या दूर गराउनुका साथै उक्त जडीबुटी खेती गरी बिक्रीबितरण गरेर आर्थिक रुपमा समेत सबल बन्न सकिन्छ भन्ने उदेश्यका साथ जनचेतनामूलक रुपमा क्लिनिक शुरु गरिएको नगरपालिकाले जनाएको छ ।