Trending

धुर्मुस सुन्तली फाउन्डेसनलाई बागमती प्रदेश सरकारले तीन करोड रुपैयाँ रकम हस्तान्तरण

चितवन। बागमती प्रदेश सरकारले धुर्मुस सुन्तली फाउन्डेसनलाई तीन करोड रुपैयाँ रकम हस्तान्तरण गरेको छ । चितवनमा निर्माणाधीन गौतम बुद्ध अन्तर्राष्ट्रिय क्रिकेट रंगशाला निर्माणका लागि प्रदेश सरकारले रकम उपलब्ध गराएको हो। मुख्यमन्त्री तथा मन्त्रिपरिषद्को कार्यालय हेटौंडामा आज मुख्यमन्त्री डोरमणि पौडेलले फाउन्डेसनका अध्यक्ष सिताराम कट्टेल र उपाध्यक्ष कुन्जना घिमिरेलाई तीन करोड रकमको चेक हस्तान्तरण गर्नुभयो । कार्यक्रममा उहाँले धुर्मुस सुन्तलीले उत्साहका साथ गरेको कामको प्रसंसा गर्नुभयो ।

सरकारले आगामी दिनमा पनि सहयोग जारी राख्ने उहाँले जानकारी दिनुभयो । रंगशाला निर्माणमा चुनौती धेरै रहेकोले जसरी पनि सफल बनाउनुपर्ने बताउँदै यो गौरवको आयोजना भएको बताउनुभयो ।

यसैगरी फाउण्डेसनका अध्यक्ष सिताराम कट्टेलले सहयोग रकम बुझ्दै खुसीको दिन भएको प्रतिक्रिया दिनुभयो । सरकारले सहयोग गर्छ भन्ने अपेक्षा रहेको भन्दै जग्गा दिएर सुरु गरेको र हाल रकम सहयोग गरेकोमा धन्यवाद दिनुभयो । रंगशाला निर्माणमा हाल २३३ जनशक्तिले काम गरिरहेको जानकारी पनि दिनुभयो । सहयोगी मनहरुले सहयोग गरिरहेको भए पनि लकडाउनले परिस्थिति जटिल बनाएको स्मरण गर्नुभयो ।

source: Saurahaonline.com

Back to top button