Trending

आफ्नै भान्जाको अपहरण, फिरौती लिएर हत्या, १३ वर्षपछि पक्राउ

काठमाडाैँ : आफ्नै भान्जाको अपहरणपछि हत्या गरेर फरार भएका एकजना भारतीय नागरिकलाई प्रहरीले १३ वर्षपछि पक्राउ गरेको छ। भारतको सितामणी जिल्ला मुजप्फरपुरस्थित आखाडाघाट घर भएका ४५ वर्षीय राजेशकुमार गुप्तालाई प्रहरीले शनिबार पक्राउ गरेको हो।

उनलाई महानगरीय प्रहरी अपराध महाशाखाको टोलीले शनिबार सर्लाहीको मलंगवा नगरपालिका-८, गोरखकालीबाट पक्राउ गरेर काठमाडौं ल्याएको हो। काठमाडौंको खिचापोखरी बस्‍ने राई स्कुल जोरपाटीका कक्षा ७ का विद्यार्थी रोहितकुमार गुप्ताको २०६४ असोज २४ गते अपहरणपछि हत्याग गरेर उनी फरार भएका थिए।

ती बालक साँझ ५ बजेको समयमा घरबाट बाहिर निस्किएको अवस्थामा अपहरणमा परेका थिए। त्यसपछि गुप्तासहितले टेलिफोन बालकका बुवा वासुदेव गुप्तासँग छोरा अपहरणमा परेका छोरा छुटाउन भन्दै २ लाख ५० हजार फिरौती मागेका थिए। फिरौती रकम दिएमा मात्र छोरा छाड्ने जानकारी गराएका उनीहरुले आफ्नो वाचाविपरीत ती बालकको हत्या गरेका थिए।

फिरौती बुझाएर पनि छोरो अपहरणमुक्त नभएफछि वासुदेवसहित परिवारका सदस्यले प्रहरीलाई खबर गरेका थिए। प्रहरीले खोजी गर्ने क्रममा असोज २७ गते राति काठमाडौं-३२, कमलादीस्थित गणेश मन्दिर नजिकै सडक पेटीमा पलास्टिकको बोरामा पोको पारी फालिएको अवस्थामा शव फेला पारेका थिए। त्यसपछि प्रहरीले अनुसन्धानलाई तीव्र बनाएको थियो।

अनुसन्धानका क्रममा बालक आपहरण तथा हत्याको योजनाकार उनकै सहोदर मामा राजेशकुमार गुप्ता रहेको खुलेको थियो। उनीसँगै बालकको अपहरण र हत्यामा खिचापोखरीमा कोठा भाडामा लिई गुप्ताकै पसलमा काम गर्ने धादिङका विष्णु सुनारसमेत संलग्‍न रहेको खुलेको थियो। प्रहरीले विष्णुलाई तत्कालै पक्राउ गरेको थियो।

विष्णुले बयानमा जादु सिकाउने बाहानामा बोलाई उक्त कोठामा लगेर हत्या गरेको स्वीकारेका थिए। माइला सुनारले नाइलनको डोरीले घाँटीमा बाँधेरर कस्दा बालक चिच्याउन खोजेका थिए। त्यसपछि अपहरणमा संलग्‍न गुप्ताले रुमालले मुख थुनिदिएका थिए। दुवै जनाले घुँडाले थिचेर बालकको हत्या गरेको खुल्न आएको थियो।

घटनापछि उनीहरुले बालकका बुवासँग लिएको २ लाख रुपैयाँ फिरौती रकम राजेशले नै त्रिभुवन पार्कसम्म लगेको बताएका थिए। त्यसपछि अपरिचित व्यक्ति ट्याक्सीमा आएर उक्त रकम लगेको भनेर गुप्ताले बालकका बुवालाई बहाना बनाएको अनुसन्धानबाट खुलेको छ।

बालकको हत्यापछि शवलाई बोरामा प्याक गरी भरियालाई व्यापारको खुद्रा सामान हो भनी कमलादी गणेशस्थान नजिक सडकमा फ्याकेको पनि पत्ता लागेको थियो। त्यसपछि मृतकका वुवा वासुदेव गुप्तालाई समेत झुक्याएर गुप्ता उनीसँगै बसी प्रहरी कार्यालयमा गएका थिए।

केही समय खोजतलाश गरेको बहाना गरेका उनी त्यसपछि बेपत्ता भएका थिए। घटनामा संलग्‍न विष्णु सुनार २०६४ म‌ंसिर १२ गते पक्राउ परेर हाल कारागारमा छन्।

sauraha online

 

Back to top button