गोरखा । गोरखाको बारपाक सुलिकोट गाउँपालिकामा जग्गाको कित्ताकाट खुलेको छ । गाउँपालिकाको भू उपयोग क्षेत्र बर्गिकरण २०८० स्थानिय राजपत्रमा प्रकाशित भइ यहि असोज १५ गते जिल्ला मालपोत कार्यलय र नापी कार्यलय गोरखामा बुझाउने कार्य समेत सम्पन्न गरेसंगै रोकिएको कित्ताकाट खुलेको छ ।
भूउपयोग नियमावली अनुसार जग्गा वर्गीकरण गरी सोमबार मालपोत कार्यालय र नापी कार्यालयलाई कित्ताकाट वर्गीकरण पुस्तक हस्तान्तरण गरेको गाउँपालिकाका अध्यक्ष बिष्णु भट्टले जानकारी दिए । अब वडा कार्यालयले कित्ताकाटका लागि सिफारिस प्रदान गर्नेछ ।
गत बर्ष जेठदेखि जग्गाको कित्ताकाट रोकिएसँगै सर्वसाधारणले जग्गा किनबेच गर्न पाएका थिएनन भने राजस्वसमेत प्रभावित हुन पुगेको थियो । भूमिको वर्गीकरण, समुचित उपयोग र प्रभावकारी व्यवस्थापन गर्ने उद्देश्यले सरकारले भूउपयोग ऐन, २०७६ ल्याएको थियो। उक्त ऐन कार्यान्वयन गर्न यही साल जेठ २३ गते सरकारले भूउपयोग नियमावली, २०७९ ल्यायो ।
नियमअनुसार जग्गालाई कृषि, आवासीय, व्यावसायिक, औद्योगिक, खानी तथा खनिज, वन, नदी–खोला, ताल, सिमसार, सार्वजनिक उपयोग र सांस्कृतिक तथा पुरातात्विक महत्वका क्षेत्रमा वर्गीकरण गर्नुपर्ने उल्लेख छ ।
