काठमाडौं, ४ असोज । गाजा क्षेत्रमा हमासले नियन्त्रणमा राखेका ४८ इजरायली बन्दीहरूको ‘बिदाई तस्वीर’ सार्वजनिक गर्दा त्यसमा नेपालका विपिन जोशीको तस्वीर पनि समावेश भएको छ। विपिन, विगत वर्ष गाजामा अपहरित भएका नेपाली नागरिक हुन्।
हमासको सशस्त्र शाखा कस्साम ब्रिगेड्सले शनिबार अनलाइनमार्फत सार्वजनिक गरेको यो संकलित फोटोमा जीवित र मृत दुवै प्रकारका बन्दीहरूको अनुहार देखाइएको छ। तस्वीरको क्याप्सनमा ती सबैलाई ‘रोन अराड’ भनेर उल्लेख गरिएको थियो—यो नाम १९८६ मा लेबनानमा हराएका इजरायली वायुसेनाका क्याप्टेन रोन अराडलाई जनाउने हो। अल जजिराका अनुसार, हमासले यो कदम इजरायलको हालसालैको हवाई र स्थलगत आक्रमण तीव्र बनेको सन्दर्भमा चर्को सन्देशका रूपमा सार्वजनिक गरेको हो ।
इजरायली सेनाले गाजा सिटीलाई ध्वस्त पार्ने र नियन्त्रणमा लिने अभियान जारी राखेका बेला यो तस्वीर सार्वजनिक भएको बताइन्छ। हमासले इजरायलको सैन्य कारबाहीका कारण गाजामा राखिएका बन्दीहरूको जीवन जोखिममा परेको चेतावनी दिएको छ। केही बन्दीहरू पहिले नै इजरायली बमवर्षाबाट मारिएको दाबी पनि हमासले गरेको छ ।
हमासले उल्लेख गरेको बिदाई सन्देशमा इजरायली प्रधानमन्त्री बेन्जामिन नेतान्याहूको हमाससँग सम्झौता नगर्ने अडान र सेनाप्रमुख एयाल जामिरको आपत्तिका बाबजुद स्थल र हवाई आक्रमण विस्तार गरिएको प्रसंग जोडिएको छ। यसले इजरायलभित्रको नेतृत्वको विभाजन र बन्दीहरूको सुरक्षाप्रति असन्तुष्टि झल्काएको विश्लेषकहरूले जनाएका छन् ।
अहिले पनि करिब २० जना बन्दीहरू जीवितै रहेको इजरायली अधिकारीहरूको दाबी छ। तर पूर्व अमेरिकी राष्ट्रपति डोनाल्ड ट्रम्पले यो संख्या २० भन्दा कम हुन सक्ने बताएका छन्। नेतान्याहू र ट्रम्प दुवैले हमासलाई परास्त गरी सबै बन्दीहरूलाई फर्काउने प्रतिबद्धता दोहोर्याइरहेका छन्।
शनिबार लाखौं इजरायली नागरिक तेल अभिभसहित विभिन्न सहरमा सरकारविरुद्ध प्रदर्शनमा उत्रिएर युद्ध अन्त्य गर्न र तुरुन्तै सम्झौतामा पुग्न माग गरिरहेका बेला हमासले यो तस्वीर सार्वजनिक गरेको हो। यसअघि पनि हमासले केही बन्दीहरूको भिडियो सार्वजनिक गरेको थियो, जसले बन्दीका परिवारहरू र अन्तर्राष्ट्रिय समुदायबीच आक्रोश र चिन्ता बढाएको थियो ।
यो घटनाले गाजा–इजरायल युद्धको मानवीय संकटलाई पुनः उजागर गराएको छ, विशेषगरी विपिन जोशी जस्ता विदेशी बन्दीहरूको सुरक्षाप्रति थप प्रश्न उठाएको छ ।
