पालुङटार नगरपालिकामा नेकपा एमालेको दोश्रो नगर अधिबेशन नयाँ कार्यसमिति चयनसंगै सम्पन्न भएको छ । जसको अध्यक्षमा पुनः बसन्त कुमार श्रेष्ठ चयन भएका छन भने उपाध्यक्षमा प्रकाश न्यौपाने, सचिवमा राममाया आले, उपसचिवमा रबिन खड्का र महिला सचिवमा सावित्रा न्यौपाने कोषाध्यक्षमा चयन भएका छन् । त्यस्तै समितिको सदस्यहरुमा चयन भएका छन् ।
२८ गते बिरुवाटारको सभा हलमा सम्पन्न अधिवेशनमा अध्यक्ष पदका लागि सर्वसहमति हुन नसकेपछि निर्वाचन मार्फत अध्यक्षको टुङ्गो लगाइएको थियो। जसमा बसन्त कुमार श्रेष्ठले ६४ मत प्राप्त गरेका थिए भने उनका निकटतम प्रतिद्वन्दी प्रकाश न्यौपानेले ३६ मत र अर्का प्रतिद्वन्दी भाेलाकुमार श्रेष्ठले ९ मत प्राप्त गरेका थिए। कुल ११२ मत खसेकोमा ३ मत भने बदर भएको निर्वाचन कमिटीले जानकारी दिएको छ ।
नगरसमिति अध्यक्ष बसन्त कुमार श्रेष्ठको अध्यक्षतामा सम्पन्न नगर अधिबेशनमा नेकपा एमालेका केन्द्रिय पोलिटव्यूरो सदस्य एवं गोरखा जिल्ला इन्चार्ज लिल बहादुर थापाले प्रमुख अतिथिको रुपमा बोल्दै पार्टीका गतिविधी को बारेमा जानकारी सहित प्रशिक्षणमूलक भनाई राख्नुभएको थियो । त्यस्तै गरी बिशिष्ट अतिथिको रुपमा नेकपा एमालेका केन्द्रिय पोलिटव्यूरो सदस्य एवं लमजुङ जिल्ला इन्चार्ज रामशरण बस्नेतले निर्देशनात्मक एवं प्रशिक्षणमूलक मन्तव्य राख्नुभएको थियो । त्यस्तै गरी नेकपा एमालेका केन्द्रिय सदस्य एवं पालिका इन्चार्ज सम्झना देवकोटा, जिल्ला अध्यक्ष सुरेन्द्र बहादुर थापा, प्रदेश कमिटी सदस्य एवं संघीय निर्वाचन क्षेत्र नं. २ का इन्चार्ज गोपाल पाण्डे, प्रदेश कमिटी सदस्य हरि काफ्ले, हरि भट्ट लगायतकाले शुभकामना मन्तव्य राखेका थिए ।
