राम धामी
आँबुखैरेनी, १ माघ । तनहुँको आँबुखैरेनीमा आइतबार मगर समुदायको राष्ट्रिय प्रमुख साँस्कृतिक चाड माघे सकराती -२०७९ भव्यताका साथ सम्पन्न भएको छ । नेपाल मगर संघ आँबुखैरेनी गाउँ समितिले आँबुखैरेनी-३, स्थित हाट बजारमा माघे सकराती-२०७९ को अवसर पारेर बृहत साँस्कृतिक तथा खेलकुद कार्यक्रम भव्यताका साथ सम्पन्न गरेको हो । सो अवसरमा ६ वटै वडाका मगर समुदायले आ-आफ्नो भेषभुषामा सजिएर एकै ठाँउमा भेला भई विविध साँस्कृतिक कार्यक्रम अन्तर्गत मगर सँस्कृतीको घाटु नाच, सोरठी नाच, कौराहा नाच, झ्याउरे नाच, हुर्रा नाच प्रस्तुत गरेका थिए । माघे सकराती विशेष कार्यक्रममा कहर सिंह थापा, शिला आले, कमल सापकोटा, बिना खाती, दिप्सन सेन्चुरी, शिव थापा लगाएतका कलाकारहरूले आफ्नो प्रस्तुति दिएका थिए । यस्तै, कार्यक्रम स्टलमा मगर समुदायको खिचडी, बङुरको मासु, गुन्द्रुक, बारा सेलरोटी, शखरखण्डा लगाएत खानाका परिकारहरु राखिएको थियो । सो अवसरमा आयोजित विविध खेलकुद कार्यक्रम अन्तर्गत घैंटो फुटाई र डोरी तान्ने प्रतियोगिता संचालन गरिएको थियो । कार्यक्रम संचालन हुनु अघि आँबुखैरेनीको विभिन्न टोल हुँदै कार्यक्रम स्थल सम्म बृहत् र्याली निकालिएको थियो । नेपाल मगर संघ आँबुखैरेनी गाउँ समितिका अध्यक्ष कटक बहादुर थापाको सभापतित्व तथा आँबुखैरेनी गाउँपालिका अध्यक्ष शुक्र चुमानको प्रमुख आतिथ्यतामा सो कार्यक्रम सम्पन्न भएको थियो । कार्यक्रममा आँबुखैरेनी गाउँपालिका अध्यक्ष शुक्र चुमान, उपाध्यक्ष दुर्गा अर्याल, निवर्तमान अध्यक्ष गिर बहादुर थापा, नेपाल मगर संघ तनहुँका जिल्ला सदस्य कमल बहादुर मगर, इलाका प्रहरी कार्यालय आँबुखैरेनीका प्रमुख गायत्री राज शर्मा, आँबुखैरेनी गाउँपालिकाका प्रवक्ता प्रेम बहादुर गुरुङ, वडा नं. ४ का वडाअध्यक्ष मिलन भुजेल लगाएतको उपस्थिति रहेको थियो ।
