२६ कात्तिक, काठमाडौं ।
राष्ट्रपति विद्यादेवी भण्डारी आइसल्याण्डबाट आज बिहान काठमाडौं फर्कनुभएकाे छ ।
विश्वभरका महिला नेताहरुको समूह वुमेन पोलिटिकल लिडर डब्लूपीएलको आयोजनामा ८–१० नोभेम्बरमा आयोजित रेक्जाभिक ग्लोबल फोरममा भाग लिएर राष्ट्रपति भण्डारी अाज नेपाल फर्कनुभएकाे हाे ।
सम्मेलनमा उहाँलाइ WPL TrailBlaizer Award बाट सम्मानित गरिएकाे थियाे ।
राष्टपति भण्डारीलाइ त्रिभुवन अन्तर्राष्ट्रिय विमानस्थलमा उनलाई उपराष्ट्रपति नन्दबहादुर पुन, प्रधानमन्त्री शेरबहादुर देउवा, राष्ट्रिय सभाका अध्यक्ष गणेशप्रसाद तिमिल्सिना लगायतले स्वागत गरेका थिए ।
राष्ट्रपति भण्डारीले अाइसल्याण्डमा अायाेजित मञ्चमा मुख्य मन्तव्य दिनुहुँदै मानवअधिकार, समानता, भेदभावरहित, समावेशी र सामाजिक रुपान्तरणका सिद्धान्त बोकेको समावेशी लोकतन्त्रलाई संस्थागत गर्ने नेपालको यात्राबारे प्रकाश पारेकाे विज्ञप्तिमा जनाइएकाे छ ।
मुख्य मन्तव्यका क्रममा भण्डारीले जलवायु परिवर्तनका कारण नेपालले सामना गरिरहेको चुनौतिलाई जोड दिँदै यी चुनौतीसँग जुध्न स्रोतसाधन, प्रविधि हस्तान्तरण र क्षमता अभिवृद्धिमा सहयोगका लागि पारदर्शी संयन्त्र र फास्ट ट्र्याक व्यवस्था गर्न अन्तर्राष्ट्रिय समुदायलाई आग्रह गर्नुभएकाे थियाे।
त्यसपछि मञ्चको छेउमा राष्ट्रपति भण्डारीसँग अाइसल्याण्डका प्रधानमन्त्री ज्याकब्सद्दिरले भेट गरेका थिए ।
भेटमा द्विपक्षीय सम्बन्धलाई थप सुदृढ बनाउने र भू-तापीय ऊर्जा प्रविधि, जलवायु परिवर्तन, पर्यटन, महिला तथा लैङ्गिक सशक्तिकरणका क्षेत्रमा अनुभव आदानप्रदान गर्ने विषयमा छलफल भएको थियो ।
त्यसैगरी युएन वुमनकी कार्यकारी निर्देशक सिमा बहौसले पनि भण्डारीसँग भेट गरी महिला राजनीतिक सशक्तिकरण र एसडीजीका सूचकहरूमा नेपालले गरेको प्रगतिको प्रशंसा गर्नुभएको थियो ।
त्यसैगरी महिला राजनीतिक नेतृका अध्यक्ष तथा संस्थापक मेहरिन र काउन्सिल अफ वुमन वर्ल्ड लिडर्सका महासचिव लौरा लिस्उडले पनि भण्डारीसँग भेट गरी लैङ्गिक, विकास र जलवायु परिवर्तनका विविध अनुभव र विषयमा छलफल गरेको विज्ञप्तिमा उल्लेख छ ।
