अशोक विश्वकर्मा/म्याग्दे । अपाङ्गता भएकाहरुको पक्षमा कार्यविधी बनाउन गरेको सहमति गाउँपालिकाले तोडेको भन्दै तनहुँको म्याग्दे गाउँपालिकाको दैलोमा स्थानीय दिपक भण्डारीले धर्ना सुरु गरेका छन् । पूर्णरुपमा अपाङ्गता भएका भण्डारीले कार्यविधी बनाउन आनाकानी गरि आफुहरु जस्ता व्यक्तिको अधिकार हनन गरेको भन्दै दोस्रो पटक धर्ना सुरु गरेका हुन् । यस अघिसमेत आफुहरुको माग सम्वोधन नगरेको भन्दै गत भदौ ८ गते उनी गाउँपालिकामा धर्ना बसेका थिए । गाउँपालिकाका अध्यक्ष श्रीप्रसाद श्रेष्ठ, उपाध्यक्ष बालकृष्ण घिमिरे र तत्कालिन प्रमुख प्रशासकीय अधिकृत नारायणप्रसाद अधिकारीले कार्यविधी निर्माण गरि अपाङ्गता भएकाहरुको अधिकार स्थापित गर्ने सहमति गरेका थिए ।
सवारी दुर्घटनामा परि १३ बर्षअिघि पूर्णरुपमा असक्त रहेका भण्डारीले राज्यले निर्माण गरेको नियमावलीको कार्यन्वयनको माग सहित अपाङ्गता भएका व्यक्तिको अधिकार सम्वन्धी ऐन २०७४ अनुसार निर्माण भएको अपाङ्गता भएको व्यक्तिको अधिकार सम्वन्धि नियमावली २०७७ अनुसार सेवा सुविधा र अवसर माग गरेका छन् । पूर्ण असक्त भएका कारण हेरचाह गर्ने व्यक्तिको माग गरेका उनले उक्त सुविधा राज्यले दिनुपर्ने नियमावलीमा उल्लेख भएको जानकारी दिए । राज्यको सुविधा दिन समेत स्थानीय सरकारले पहल नगरेको भन्दै उनी असन्तुष्ट छन् । आम्दानीको स्रोत समेत नभएपछि जीवन रक्षाका लागि सरकारको सहायता खोजेको उनी बताउँछन् । ‘यस्तो अवस्थामा सरकार अभिभावक बन्नुपर्ने हो ।’
गाँपालिकाका सुचना अधिकार विष्णुप्रसाद खनालले भण्डारीको माग प्रति आफुहरु सकरात्मक रहेको बताए । अध्यक्ष, उपाध्यक्ष र प्रमुख प्रशासकीय अधिकृत विदामा रहेकाले तत्काल निर्णय गर्ने अवस्था नभएको जानकारी दिदै कार्यविधि निर्माणमा गाउँपालिका तयार रहेको बताए । ‘सरकारले निर्माण गरेको निमावलीमा यस्ता ब्यक्तिहरुको अधिकार स्थापनाका लागि स्पष्ट उल्लेख नगरेकाले अलमल भएको छ ।’ उनले भने ‘उहाँको अनिश्चितकालिन धर्नालाई सम्बोधन गर्ने तयारी छ तर निर्णय भईसकेको छैन ।’
