भूकम्प प्रतिरोधी घर निर्माणका लागि ७ दिने महिला डकर्मी तालिम

गोरखा नगरपालिकामा महिला डकर्मीहरुका लागि भूकम्प प्रतिरोधी घर निर्माण सम्बन्धी ७ दिने डकर्मी तालिम सुरु भएको छ । गोरखा नगरपालिका वडा नम्बर ३ नारेश्वरमा महिला डकर्मीको क्षमता अभिवृद्धि सम्बन्धी तालिम सुरु भएको हो । भारत सरकारद्धारा सहयोग प्राप्त नेपाल आवास पुनर्निर्माण परियोजनाले सहिजकरण गरेको तालिममा सुरक्षित अवास निर्माणका लागि प्रारम्भिक स्तर देखि नै तालिम दिइने छ । गोरखा नगरपालिका वडा नम्बर ३ का अध्यक्ष रामबाबु बोगटीले उद्धघाटन गर्दै तालिममा सिकेको सीपको कार्यान्वयन गरि महिलाहरु अग्रसर भई भूकम्प प्रतिरोधी सुरक्षित घर निर्माण गर्नु नै उपलब्धी भएको बताउनुभयो । महिला डकर्मीले नै नेतृत्व गरी सुरक्षित आवास निर्माण गरे तालिमको उपलब्धी हुनेछ, उहाँले भन्नुभयो । तालिममा सहभागी गोरखा नगरपालिका वडा नम्बर ३ नारेश्वरकी सम्झना सुनारलाई तालिमले हौशला प्रदान भएको भन्दै सुरक्षित घर निर्माणका लागि महिला डकर्मीले नेतृत्वदायी भूमिका खेल्न सक्ने बताउनुभयो । उहाँले भन्नुभयो, विभिन्न व्योधानलाई चिर्दै आफुले सिकेको सिपले भूकम्प प्रतिरोधी घर निर्माणमा आफ्नो समुदायमा अग्रसर हुन उत्सुक छु । १० जना महिला सहित प्रशिक्षकको सहभागिता रहेको तालिममा भूकम्प प्रतिरोधी आवास निर्माणका लागि विभिन्न प्रविधिको प्रयोगात्मक सहित सैद्धान्तिक अभ्यास गराईने परियोजनाका जिल्ला इन्जिनियर विरेन्द्र श्रेष्ठले जानकारी दिनुभयो । परियोजनाका सामाजिक विज्ञ घनश्याम खतिवडाले निजी आवास पुनर्निर्माणमा महिला डकर्मी समेत अब्बल रहेको र क्षमता अभिवृद्धिका लागि मद्दत मिल्ने भन्दै जिविकोपार्जनको माध्यम बनाउन आग्रह गर्नुभयो ।
परियोजनाले तालिममा ढुंगामाटोको गारो, इँटाको गारो सिमेन्ट लगायत विभिन्न प्रविधिका विषयमा अभ्यास गराउने छ । यसअघि, परियोजनाले पालुंगटार नगरपालिकामा समेत भूकम्प प्रतिरोधी घर निर्माण सम्बन्धी ७ दिने महिला डकर्मी अभिमूखिकरण तालिम सञ्चालन गरेको छ ।