गोरखा,
उत्तरी गोरखाको चुमनुब्री गाउँपालिका ६ को लोक्पा पहिरोमा फसेका एक युवाको हेलिकप्टरमार्फत उद्धार गरिएको छ ।
बिहिबारदेखि पहिरोमा फसेका सुर्खेतका ३४ बर्षका दिपक जिसीको नेपाली सेनाको हेलिकप्टरमार्फत उद्धार गरिएको प्रमुख जिल्ला अधिकारी शंकरहरि आचार्यले जानकारी दिनुभयो । पहिरोमा फसेका जिसी ओढारमा बस्नु भएको थियो । उहाँको खुट्टा भाँचिएको छ । गृहमन्त्रालयको बिपद् ब्यवस्थापन कोषमार्फत खर्च ब्यहोर्ने गरी उद्धार भएको जिल्ला प्रशासन कार्यालय गोरखाले जनाएको छ ।
हेलिकप्टरबाट डोरीको सहायताले जिसीको उद्धार गरिएको चुमनुब्री गाउँपालिका वडा नम्बर ६ का अध्यक्ष सरोज लामाले बताउनुभयो । उहाँलाई सेनाको हेलिकोप्टरबाट नै उपचारका लागि काठमाण्डौंको शिक्षण अस्पताल लगिएको छ ।
स्थानीय स्तरमा पहिरोमा फसेका युवाको उद्धार सम्भव नभएपछि गाउँपालिकाले प्रशासनलाई आग्रह गरेको थियो । मजदुरीको सिलसिलामा छेकम्पार पुगेका जिसी घर फर्कने क्रममा पहिरोमा फसेका थिए ।
