कोरोना संक्रमण देखिएका नारेश्वरका युवा तीन दिन पैदल हिडेर गोरखा आएका थिए
मनकामना बहिरा मावि क्वारेण्टाइनमा कोरोना पोजेटिभ देखिएका एकजना काठमाडौंबाट आएको खुलेको छ ।
गोरखा नगरपालिका ३ नारेश्वर घर भएका उनी काठमाडौंको एक होटलमा काम गर्ने ३६ बर्षका युवा रहेको खुलेको हो ।
उनी २८ दिनअघि काठमाडौंबाट पैदल हिडेर गोरखा आएका थिए । पहिलो रात धार्केमा, दोस्रो रात कुरिनटारको पाटीमा बास बसेका उनी तेस्रो दिनमा मझुवा पुल हुदै गोरखा प्रवेश गरेको पाइएको छ । मझुवा होल्डिङ सेण्टरमा राखी उनलाई मनकामना बहिरा माविको क्वारेण्टाइनमा राखिएको परिबारस्रोतले जनाएको ।
उनलाई कसको सम्पर्कबाट कोरोना संक्रमण देखियो भन्ने बारे अन्यौल रहेको परिबार स्रोतले जनाएको छ ।
उनीसहित मनकामना बहिरा माविको क्वारेण्टाइनमा रहेका सातै जनालाई गोरखा अस्पतालको आइसोलेशनमा ल्याउने तयारी गरिएको स्वास्थ्य शाखाले जनाएको छ ।
नेपालभित्रबाट आउने सर्वसाधारणमा पनि कोरोना पोजेटिभ देखिने भएकाले जिल्ला प्रवेश गर्ने जो कोहीलाई क्वारेण्टाइनमा राख्नु आवश्यक देखिएको वडा नं. ३ का अध्यक्ष राम बोगटीले जानकारी दिए ।
‘भारतबाट आउनेमा मात्र कोरोना आउने, नेपालबाट आउनेमा कोरोना नआउने भन्ने त होइन रहेछ । यहाँ हामी आर्मी, पुलिस हौं भन्दै ड्रेस लगाएर आउने, कसैले छेकथुन पनि नगर्ने चलन छ’, उनले भने, ‘यसरी आउने जाने गर्दा कोरोना सर्ने त्रास हुने रहेछ । यस्तो काम तत्काल बन्द गर्नुपर्ने देखिएको छ ।
