गोरखा नगरपालिका वडा नं. ९ ठिगुरेश्वारामा सवारी दुर्घटना हुदाँ नेपाली सेनाका एक जनाको मृत्यु भएको छ ।
गोरखा बजारबाट आँबुखैरेनीतर्फ जाँदै गरेको ग. १ क ५६५४ नम्बरको ट्रिपर र विपरीत दिशाबाट आउँदै गरेको बा. ७० प २८७१ नम्बरको मोटरसाईकल एक आपसमा ठक्कर खाँदा मोटरसाइकलमा सवार नेपाली सेनामा कार्यरत दुई जना घाइते भएका थिए ।
शनिबार अपरान्ह पउने पाँच बजेतिर भएको सो दुर्घटनामा परी गोरखास्थित रिपुमर्दन गणमा कार्यरत लेसद्वय सुरेन्द्र राई र जनम राई घाईते भएको जिल्ला प्रहरी कार्यालय गोरखाले जनाएको छ । घाइते मध्य २५ वर्षीय सुरेन्द्र राईको गोरखा अस्पतालमा उपचारको क्रममा मृत्यु भएको प्रहरी निरिक्षक धुव्र प्रसाद शर्माले बताए ।
अर्का घाइते २४ वर्षीय जनमको उपचार भई रहेको उनले जानकारी दिए । ट्रिपर चालक अजिरकोट गाउँपालिकाका ३३ वर्षीय चन्द्रबहादुर परियारलाई प्रहरीले नियन्त्रणमा लिएको जनाएको छ ।
