पौष 15 गते गोरखा
गोरखाको पालुङटार नगरपालिका वडानम्बर 7 च्याङलीमा तमु ल्होसार मनाइएको छ ।
वडा नम्बर-7 को खोला घाटमा रहेको सरस्वती आमा समूहका अध्यक्ष अनिता गुरुङको अध्यक्षतामा कार्यक्रम सम्पन्न भएको थियो । कार्यक्रममा प्रमुख अतिथिको रुपमा बोल्दै नेकपा माओवादी केन्द्रका केन्द्रिय सदस्य अमर तमुले यस पर्वको महत्वका बारेमा चर्चा गर्नुभएको थियो । सोही अवसरमा पालुङटार नगरपालिकाकी नगर उपप्रमुख बन्दना पाण्डेले समसामयिक बिषयमा आफ्ना भावनाहरु राख्नुभएको थियो । त्यस्तैगरी कार्यक्रममा नेकपा एमालेका चन्द्रबहादुर कुमाल, नेपाली कांग्रेस का कृष्ण जी श्रेष्ठ , स्वास्थ्य चौकीका प्रमुख भरतराज पाण्डेलगायतका ले आफ्नो मन्तब्य राखेका थिए । स्रोही अवसरमा कार्यक्रमको संचालन भने ओम प्रकाश गुरुङले गर्नु भएको थियो । बाघ वर्गलाई विदा गर्दै बिरालो वर्गलाई स्वागत गर्ने अवसरका रुपमा यस लोसारलाई मनाइएको पनि अवसरमा बताइएको थियो । गुरुङ समुदायले पुरानो वर्षलाई बिदाइ गरी नयाँ वर्षलाई स्वागत गरि तमु ल्होसार हरेक वर्ष पुस 15 गते मनाउँदै आउने गरेको छ । तमु ल्होसार पर्व सूर्यको किरणसँग पनि सम्बन्धित रहेको छ । पुस 15 गते को रात सबैभन्दा लामो हुने र यसपछिका रात गर्दै जाने भएकाले पनि यसको महत्व रहेको बताइन्छ । गुरुङ समुदायको बाक्लो बस्ती रहेको गण्डकी प्रदेशका गोरखा लमजुङ कास्की लगायतका विभिन्न जिल्लामा यो पर्व विशेष हर्षोल्लासका साथ मनाउने गरिन्छ । त्यस्तैगरि राजधानी तथा देशका अन्य स्थान र विभिन्न देशमा बस्ने गुरुङ समुदायले पनि तमु ल्होसार पर्व मनाउँदै आउने गरेका छन् । यस पर्वका अवसरमा सरकारले देशैभर सार्वजनिक विदा समेत दिने गरेको छ । 
