गोरखा :
यस वर्षको तुलसीमान श्रेष्ठ स्मृति सम्मान प्राध्यापक तुलसी दिवसलाई प्रदान गरिने भएको छ । हालै सम्पन्न तुलसीमान श्रेष्ठ स्मृति समाजको बैठकले तुलसी दिवसलाई सो सम्मान दिने निर्णय गरेको हो ।
नेपाली लोक साहित्य र संस्कृतिको जगेर्ना र उत्थान गर्नका लागि अनवरत लागि रहेकाले तुलसी दिवसलाई सो सम्मान प्रदान गर्न लागिएको समाजका निरज श्रेष्ठले जानकारी दिए ।
सो सम्मान आउँदो मंसीर २४ गते शनिबार नेपाल प्रज्ञा प्रतिष्ठानमा एक समारोह आयोजना गरी सम्मान प्रदान गर्ने कार्यक्रम रहेको उनले बताए ।
नेपाली लोकगीत तथा लोक साहित्यका क्षेत्रमा अनवरत सेवा गरिरहेका पालुङ्टार नगरपालिका- ७ च्याङ्लीका तुलसीमान श्रेष्ठको २०७३ सालमा निधन भएको थियो । उनी गोरखाको एक मात्र सरकारी क्याम्पस गोरखा क्याम्पसका प्रमुख रहेर लामो समय सेवा गरेका थिए भने गोरखाको पहिलो पत्रिका दरौँदी दैनिकका संस्थापक प्रधान सम्पादक पनि थिए ।
त्यस्तै विभिन्न लोकगीत, संगीत तथा साहित्यिक सामाजिक संघसंस्थामा रहेर पनि काम गरेका थिए । उनको योगदानलाई मुलुकभर फैलाउने उद्देश्यले तुलसीमान श्रेष्ठ स्मृति समाज र तुलसीमान श्रेष्ठ लोकसाहित्य सम्मानको स्थापना भएको श्रेष्ठ पुत्र निरज श्रेष्ठले बताए ।
त्यस्तै तुलसी दिवस(तुलसीप्रसाद जोशी) नेपाल प्रज्ञा प्रतिष्ठानका आजीवन सदस्य तथा नेपाली लोकगीत समाजका अध्यक्ष पनि हुन् । उनलाई अप्रिल २०१३ मा भारतमा भएको अन्तर्राष्ट्रिय कविता महोत्सवमा विशिष्ट साहित्य शिरोमणि उपाधिबाट सम्मानित गरिएको थियो ।
प्राध्यापक दिवशले अमेरिकास्थित नेपाली दूतावासमा सांस्कृतिक सचिवको रूपमा काम गर्नुका साथै विदेशका विभिन्न विश्वविद्यालयमा भिजिटिङ प्रोफेसरका रूपमा अध्यापन गरेका थिए ।
दिवशले काठमाडौंको त्रिचन्द्र कलेज र पद्मकन्या क्याम्पसमा नेपाली साहित्यका प्राध्यापकका रूपमा सेवा गरिसकेका छन् । उनले नेपालको विभिन्न जनजातिको साहित्य, लोक संस्कृति र लोककथाका बारेमा दर्जनौं पुस्तक लेखेका छन् ।
साभारः अन्नपूर्णपाेष्ट
