तीन घण्टा ११ मिनेट १ सेकेण्डमा निर्धारित ४२ किलोमिटर दुरी पार गर्दै शनिवार गोरखामा भएको म्याराथुन दौडमा नेपाली सेनाको भबानी दल गणका जमदार तिर्थबहादुर तामाङ बिजयी भएका छन् । ‘लिगलिगकोट–सिरानचोक–गोरखा दरबार दोस्रो खुल्ला म्याराथुन दौड २०७९’ मा सहभागी ९३ जनालाई पछि पार्दै तामाङ उपाधी उचाल्न सफल भएका हुन् । उनले नगद एक लाख ५० हजार रुपैयाँ सहित मेडल र प्रमाण पत्र पाएका छन् ।
गोरखा नगरपालिका, पालुङटार नगरपालिका, सिरानचोक गाउँपालिका र नेपाली सेना रिपुमर्दन गणको आयोजनामा भएको प्रतियोगितामा तीन घण्टा १२ मिनेट १७ सेकेण्डमा निर्धारित दुरी पार गर्दै भारतीय सेनामा कार्यरत अनिश थापा मगर दोस्रो भए । उनले नगद एक लाख पुरस्कार पाएका छन् । एक मिनेट १६ सेकेन्डको अन्तरले उनी उपबिजेता भए ।
नेपाली सेनाको बरख गणका मोहनदेव जोशीले तीन घण्टा १५ मिनेट १५ सेकेण्डमा दौड पुरा गर्दै तेस्रो भए । उनले नगद ७५ हजार पाएका छन् । चौथो र पाँचौ भएका चण्डिप्रसाद गणका देबराज महत्तरा र भिमकाली गणका गोबिन्द कार्कीलाई क्रमस ५० र ३५ हजार पुरस्कार प्रदान गरियो । १० जना भित्र पर्न सफल सोलोखुम्बु महाकुलुङका अर्जुन राई कुलुङ, महेन्द्र दल गणका थमबहादुर अधिकारी, सिरानचोक ५ गोरखाका अशोक बराम, भुतपूर्व सैनिक रैबतबहादुर दाहाल र महाविर सौर्य गणका बिमल खड्का लाई क्रमस ३०, २५, २०, १५, १० हजार पुरस्कार प्रदान गरिएको छ ।
पहिलो पटक सहभागि मै प्रथम हुन पाउदा निकै खुसी लागेको उपाधि विजेत तीथ तामाङले बताए । पालुङटारको लिगलिगकोट देखि गोरखा दरबार सम्मको रुटलाई अल्ट्रा म्याराथुन दौडको रुपमा पनि विकास गर्न सकिने उनको भनाइ छ । ‘यो ठाउँ अल्ट म्याराथुन गर्न धेरै राम्रो हुन्छ तर पिचलाई रुट नबनाई डाउन अप गर्ने मिल्ने सा–साना गोरेटो बाटोहरु निकाल्नु पर्छ । अल्ट्रा म्याराथुनका लागि सके सम्म पिच नछोएको धेरै राम्रो हुन्छ, विदेशीहरुले पिच छोएको मन पर्देन,’ उनले भने ।
इतिहासको प्रर्वद्धन गर्न एकिकृत ट्रेलको रुपमा बिकास गर्न नेपाली सेनाको शक्रियतामा सिरानचोक गाउँपालिका, पालुङटार र गोरखा नगरपालिकाले विसं २०७६ देखि यो म्याराथुन सुरु गरेका हुन् । कोरोना प्रभावका कारण दुई वर्ष रोकिएको दौड अहिले संचालन भएको रिपुमर्दन गण गोरखाका गणपति हेम बिष्टले बताए ।
विसं १६१६ मा भदौ २५ गते राजा द्रब्यशाहाले दौड जितेर गोरखा राज्यको राज्यभिषेक गरिएको इतिहास छ । गोरखा राज्यको सिमानालाई रक्षा गर्न भन्दै राजाले तत्कालिन समयमा सिरानचोककोट प्रयोग गरेका थिए । इतिहासले लिगलिगकोट, सिरानचोककोट र गोरखा दरबार जोडेकाले एउटा ट्रेलको रुपमा बिकास गर्न म्याराथुन निरन्तर गर्नुपर्नेमा स्थानीय तहका प्रमुखहरुले जोड दिए ।
कार्यक्रमका प्रमुख अथिती मध्ये कमाण्ड हेडक्वाटरका कमाण्ड सेनापति उपरथी बाबुराम श्रेष्ठले गढी किल्ला दरवार र एकिकरणको दौरानमा प्रयोग भएका मार्गहरु पहिचान गरि संरक्षण सम्र्वद्धन बिकास गर्ने योजना अनुसार यो दौड प्रतियोगिता भएको बताए ।
नेपालको उत्पत्तिदेखि जग सम्म अवधारणा बमोजिम संचालन भएको दोस्रो लिगलिगकोट सिरानचोक गोरखा दरवार खुल्ला म्याराथुन दौड प्रतियोगिता २०७९ ले राष्ट्रिय एकिकरणमा वीर गोर्खालीले देखाएको अदम्य शाहस र चरित्रलाई मद्धत पुग्ने अपेक्षा गरिएको बताए ।
कार्यक्रममा जिल्ला समन्वय समितिका प्रमुख मोहनबहादुर थापा मगर, गोरखा नगरपालिकाका प्रमुख कृष्णबहादुर राना मगर, पालुङटार नगरपालिकाका प्रमुख बिवस चिन्तन, सिरानचोक गाउँपालिका अध्यक्ष ज्ञानेन्द्र गुरुङ लगायतले मन्तब्य राखेका थिए । म्याराथुनले राष्ट्रिय स्तरका खेलाडीलाई अवसर प्रदान गर्नुका साथै गोरखाको पनि प्रचार प्रसारमा मद्धत पुग्ने जनप्रतिनिधिहरुले बताए ।
शनिवार बिहान पालुङटारको लिगलिगकोटबाटसुरु भई सिरानचोकोट हुँदै गोरखा दरवार सम्म दौड भएको हो । नेपाली सेना, प्रहरी शसस्त्रमा कार्यरत, राष्ट्रिय धावकहरु र सर्वसाधारणले पनि प्रतियोगितामा भाग लिएका थिए ।
यो गोरखामा अहिले सम्मकै धेरै पुरस्कार राशी भएको म्याराथुन हो । नेपाली सेनाको प्रयासमा यो दौड २०७६ मा सुरु भएको हो । पहिलो वर्षको म्याराथुन प्रतियोगितामा गोरखाको आरुघाट गाउँपालिका घर भई काठमाण्डौँ बस्दै आएका भिबहादुर गुरुङ बिजयी बनेका थिए ।
