गोरखा, फागुन २७
गोरखाको पालुङटार नगरपालिका वडा नं. ७ मा आयोजित च्याङली शिवरात्री धार्मिक तथा साँस्कृतिक मेला २०७७ को अवसरमा आयोेजित नृत्य प्रतियोगितामा सरस्वती महिला समूहकी शान्ती गुरुङ प्रथम भएकी छन् ।
३ दिनसम्म सञ्चालन भएको सो कार्यक्रममा १२ वटा समुहहरुले प्रस्तुति राखेका थिए । त्यस्तै दिगो महिला समूह दित्तीय, कालिका महिला समूह तृतीय र मञ्जिला परियार र दिपशिखा कुमालले सान्तवना स्थान हासिल गरेका थिए ।
कार्यक्रम मंगलेश्वर मन्दिर व्यवस्थापन समितिका अध्यक्ष रामकृष्ण भण्डारीको अध्यक्षतामा सम्पन्न भएको थियो । प्रमुख अतिथिको रुपमा बोल्दै वडा नंं. ७ का वडाध्यक्ष बसन्त कुमार श्रेष्ठले धार्मिक तथा साँस्कृतिक महत्व बोकेको यस मन्दिरलाई व्यवस्थित बनाउन धेरै काम गर्नुपर्ने बताउनुभयो ।
त्यस्तै कार्यक्रममा प्रगति महिला समूह याम्पाफाँट तनहुँकी अध्यक्ष रिता तिवारी, च्याङली स्वास्थ्य चौकीका प्रमुख भरतराज पाण्डे, तिवारी फर्निचरका गणेश तिवारी लगायतकाले मन्तव्य राखेका थिए । कार्यक्रमको सञ्चालन तथा समन्वय गोरखा संसार मिडिया प्रा.लि.का सञ्चालक रविन्द्र कंडेलले गर्नुभएको थियो ।
कार्यक्रमको अन्तिम दिन २७ गते राष्टिय कलाकार पवन रानाको प्रस्तुतिले माहोल तताएको थियो ।
कार्यक्रमका अवसरमा भवन निर्माण तथा मेला सञ्चालका लागि सहयोग गर्ने सहयोगदाताहरुलाइ सम्मान तथा प्रसंसा पत्र समेत प्रदान गरिएको थियो ।
सोही अवसरमा मन्दिर परिसरमा निर्माण गरिएको एककोठे कार्यालय भवनको उदघाटन समेत गरिएको थियो । कार्यालय भवन प्रमुख अतिथि पालुङटार नगरपालिका वडा नं. ७ का वडाध्यक्ष बसन्त कुमार श्रेष्ठले गर्नुभएको थियो ।
