आजदेखि आँबुखैरेनी रंगशाला कप सेभेन साईड नकआउट फुटबल प्रतियोगिता सुरु ।।

आँबुखैरेनी, ७ फागुन । तनहुँको आँबुखैरेनी गाउँपालिका–२, मार्किचोकमा आजदेखि आँबुखैरेनी रंगशाला कप सेभेन साईड नकआउट फुटबल प्रतियोगिता सुरु भएको छ । “सक्छौं त प्रेम गर सक्दैनौं घृणा पनि नगर” भन्ने मूल नाराका साथ मार्कीचोक युवा क्लबको आयोजनामा आँबु–२, मार्किचोक स्थित कुडुलेमा सो प्रतियोगिता सुरु भएको हो । प्रतियोगिताको एक समारोहकाबीच आँबुखैरेनी गाउँपालिका उपाध्यक्ष पुष्पादेवी श्रेष्ठले उद्घाटन गर्नुभएको छ । उद्घाटन समारोहलाई सम्बोधन गर्दैै उहाँले यस रंगशालालाई राष्ट्रिय स्तरको रंगशालाको रुपमा विकास गर्ने योजनाका साथ अगाडी बढ्दै गएको र भविष्यमा यस क्षेत्रबाट राष्ट्रिय तथा अन्तराष्ट्रिय स्तरको खेलाडी उत्पादन गराउन रंगशालाले महत्वपूर्ण भूमिका खेल्ने बताउनुभएको छ । मानिसका आधारभूत आवश्यक तत्व गास, बास, कपास जस्तै, स्वास्थ्यको लागि खेलकुद अति आवश्यक रहेको बताउनुहुँदै उपाध्यक्ष श्रेष्ठले खेल अवधिभर सम्पूर्ण खेलाडीहरुलाई अनुशासन पूर्वक फुटबल खेल्न आग्रह गर्नुभएको छ । क्लबका अध्यक्ष आदम गुरुङ्गको अध्यक्षतामा भएको उद्घाटन कार्यक्रममा गाउँपालिका उपाध्यक्ष पुष्पादेवी श्रेष्ठ, वडा नं. २ का वडाध्यक्ष कटक बहादुर थापा, लेखाअधिकृत टेकनाथ पराजुली, ईन्जिनियर पंकज चितौरे मगर, समाजसेवी बेल बहादुर गुरुङ्ग लगाएतको उपस्थिती रहेको थियो । कार्यक्रममा लेखाअधिकृत टेकनाथ पराजुलीले प्रतियोगितामा उत्कृष्ट खेलाडीलाई नगद ५ हजार रुपैंया दिने घोषणा गर्नुभएको छ । फागुन १० गते सम्म चल्ने प्रतियोगिताको बिजेताले नगद रु. ५० हजार र उपबिजेताले नगद रु. २५ हजार प्राप्त गर्नेछ ।