जीवन ज्योति मा.वि.को ५२ औं बार्षिक उत्सव तथा अभिभावक भेला सम्पन्न

गोरखा संसार
फागुन २२, गोरखा ।
पालुङ्टार नगरपालिका वडा नं. ७ मा अवस्थित जीवन ज्योति माध्यमिक विद्यालयको ५२औं बार्षिक उत्सव समारोह तथा अभिभावक भेला सम्पन्न भएको छ ।
विद्यालय व्यवस्थापन समितिका अध्यक्ष वसन्त कुमार श्रेष्ठको अध्यक्षतामा सम्पन्न कार्यक्रममा प्रमुख अतिथिको रुपमा बोल्दै पालुङ्टार नगरपालिकाका नगर प्रमुख दीपक बाबु कंडेलले शैक्षिक क्षेत्रमा देखिएका विकृति हरु हटाएर अघि बढन जरुरी रहेको बताउनुभयो । सोही क्रममा उहाँले आफू जनताको प्रतिनिधी भएको र गरीब निमुखा जनताको न्यायको लागी हरतरहले लडिरहने बताउनुभयो । त्यस्तै क्रममा सम्बृद्ध पालुङ्टारको लागी आफूले देखेको सपना पूरा गर्ने क्रममा अघि बढेको र आफ्नो तर्फबाट कुनै गल्ती भएमा कठघरामा उभिन तयार रहेको समेत बताउनुभयो । कुनै पनि बेला बुबा आमा र गुरुलाई सम्मान गर्न सकिएन भने शिक्षा आर्जन गरेको कुनै अर्थ नहुनेसमेत उहाँले बताउनुभयो ।
विद्यालयका सहायक प्रधानाध्यापक तारा बहादुर कुमालले स्वागत मन्तव्य राख्नुभएको कार्यक्रममा शिक्षा युवा तथा खेलकुद शाखा पालुङ्टारका प्रतिनिधी माधव पोख्रेल, शिक्षकहरुका तर्फबाट रमेश खडका, विद्यार्थीका तर्फबाट विवेचना देवकोटा, शिक्षक अभिभावक संघका तर्फबाट कमल वि.क, विद्याय व्यवस्थापन समितिका पूर्व अध्यक्ष मन बहादुर कुमाल, जनजागृति आधारभूत विद्यालयका प्रधानाध्यापक बाबुराम देवकोटा, कार्यपालिका सदस्य सावित्रा वि.क., वडासदस्य देवीलाल कुमाल लगायतकाले शुभकामना मन्तव्य राखेका थिए ।
कार्यक्रमका अवसरमा बोल्दै शिक्षा शाखका प्रतिनिधी पोख्रेलले नगरपालिकाले शैक्षिक क्षेत्रसंग सम्बन्धित नियमावलीहरु समेत निर्माण गरी कार्यान्वयनको चरणमा अघि बढेको बताउनुभयो ।
विद्यालयका शिक्षक कुमार प्रसाद ढकालले सञ्चालन गर्नुभएको कार्यक्रममा विद्यार्थीहरुले नृत्य, गीत लगायतका प्रतिभा प्रस्तुत गरेका थिए ।
कक्षा १ देखि १२ सम्म पठनपाठन भइरहेको यस विद्यालयमा करिब ९०० विद्यार्थीहरु अध्ययनरत छन । २०७२ को भूकम्पपछि विद्यालय भवन जीर्ण भएकोमा जापानी सहयोग निकाय जाइका को सहयोगमा सुविधासम्पन्न २४ कोठाका ३ वटा भवनहरु रहेका छन । विद्यार्थी संख्याको आधारमा दरबन्दी नहुँदा पठनपाठनमा कठिनाई हुँदै आएको विद्यालयका प्रधानाध्यापक पाण्डेले बताउनुभयो । सो विद्यालयमा कक्षा १ देखि १० सम्म अंग्रेजी माध्यममा पठन पाठन हुँदै आइरहेको छ भने गुणस्तर सुधारको लागी विद्यालयमा धेरै नयाँ कदमहरु अपनाइरहेको विद्यालय व्यवस्थापन समितिका अध्यक्ष वसन्त कुमार श्रेष्ठले बताउनुभएको छ ।