गोर्खा । प्रधानमन्त्री पुष्पकमल दाहाल `प्रचण्ड´ले सुरेश वाग्ले वासु लगायत हजारौं सहिदहरूको सपना पूरा गर्ने जिम्मेवारी काँधमा रहेको बताउनु भयो।
कुनै समय सुरेश वाग्लेले अध्यापन गर्नु भएको श्री जनता माध्यमिक विद्यालयमा आयोजित सहिद सुरेश वाग्ले (वासु) र भीमसेन पोख्रेलको २४ औं स्मृति सभा तथा सालिक अनावरण कार्यक्रमलाई सम्बोधन गर्दै प्रधानमन्त्री प्रचण्डले सो कुरा बताउनु भएको हो।
सो क्रममा प्रधानमन्त्री प्रचण्डले जनयुद्धका सहिदहरूलाई स्मरण गर्दै माओवादीले उठाएका मुद्दा र जनताको चाहना पूरा गर्न अझै बाँकी रहेको बताउनु भयो।
प्रधानमन्त्री प्रचण्डले आफू प्रधानमन्त्री बनेपछि सरकारले जनयुद्ध र जनयुद्धका सहिद, बेपत्ता र योद्धालाई सम्मान गर्ने वातावरण बनाएको बताउनु भयो। त्यसको सुरुवात जनयुद्ध र जनआन्दोलनका सम्पूर्ण सहिदहरूलाई राष्ट्रिय सहिदको घोषणा गरेर राजपत्रमा प्रकाशित गरी जनयुद्ध दिवसलाई राष्ट्रिय दिवस घोषणा गरेर गरिएको बताउनु भयो।
अहिले सत्य निरूपण तथा बेपत्ता सम्बन्धी विधेयक प्रक्रियामा रहेको बताउँदै प्रचण्डले पारित भएपछि देशैभर सहिद बेपत्ता परिवारको सम्मान हुने बताउनु भयो।
आज महान् सहिद कमरेड सुरेश वाग्ले (वासु) र कमरेड भिमसेन पोख्रेल (बैरागी) को २४ औं स्मृति दिवसको अवसरमा आयोजित कार्यक्रममा सहभागी हुन प्रधानमन्त्री गोर्खा आउनु भएको हो।
जनताको सर्हारावादी क्रान्तिको नेतृत्व र प्रतिनिधित्व गर्दै पार्टीको महत्वपूर्ण जिम्मेवारी बहन गर्न अघि बढ्ने क्रममा कमरेड सुरेश वाग्ले र भिमसेन पोख्रेललाई २०५६ भाद्र २३ गते गोर्खा जिल्लाको गाँखुमा तत्कालीन राज्य पक्षले हत्या गरेको थियो।
