गोरखाको गण्डकी गाउँपालिका–४ पाटापाटीमा मंगलबार बिहान धन्सार भत्किएर मुत्यु हुनेको संख्या दुई पुगेको छ । बिहान स्थानीय जगबहादुर बरामको बनाउदै गरेको धन्सार भत्किएर गम्भीर घाइते हुनुभएका ६५ बर्षका रामकृष्ण बरामको उपचारको क्रममा अस्पतालमा मृत्यु भएको जिल्ला प्रहरी कार्यालय गोरखाका सूचना अधिकारी प्रहरी नायव उपरीक्षक (डिएसपी) रमेशकुमार श्रेष्ठले जानकारी दिनुभयो ।
गम्भीर घाइते हुनुभएका बरामको काठमाण्डौंको ट्रमा सेन्टरमा उपचारका क्रममा अघि साँझ मृत्यु भएको उहाँले बताउनुभयो । मृतक रामकृष्ण धन्सार बनाउनका लागि जगबहादुृरको घरमा मेला आउनु भएको थियो । दुर्घटनामा घरघनी जगबहादुरकी श्रीमती ४५ बर्षकी मीना बरामको भने घटनास्थलमा नै मृत्यु भएको थियो । दुर्घटनामा घाइते भएका दुई जनाको अबस्था भने सामान्य रहेको उहाँले बताउनुभयो ।
घाइते हुनेहरुमा मृतक मीनाका श्रीमान श्रीमान ४५ बर्षका जगतबहादुर बराम, २१ बर्षका छोरा सुजन बराम रहनु भएको डिएसपी श्रेष्ठले जानकारी दिनुभयो । घटनाको जानकारी पाएलगत्तै ताङ्लीचोक प्रहरी चौकीबाट प्रहरीको टोली घटनास्थलमा पुगेर घाइतेहरुको उद्धार गरेको थियो । घटनाको थप अनुसन्धान सुरु गरिएको डिएसपी श्रेष्ठले जानकारी दिनुभयो ।
