गोरखामा संचालित जिल्लास्तरीय खुल्ला शिक्षक हाजिरीजवाफ प्रतियोगिता गण्डकी गाउँपालिकाले जितेको छ । शिक्षा विकास तथा समन्वय इकाइ गोरखाद्वारा शनिबार र आइतबार विद्यार्थी वक्तृत्वकला, शिक्षक हाजिरीजवाफ तथा शिक्षक–विद्यार्थी नृत्य प्रतियोगिता संचालन भएको थियो ।
दुईदिनसम्म संचालन भएको शिक्षक हाजिरीजवाफ प्रतियोगितामा गण्डकी गाउँपालिका प्रथम भएको छ । गण्डकी गाउँपालिकाको तर्फबाट सहभागी भवानी मावि मकैसिङका सुजन सुनार विक, भवानी मावि दर्वुङका नरेन्द्र विक, ज्ञानमार्ग मावि घ्याल्चोकका मेघनाथ रेग्मीको टिम प्रथम भएको हो ।
प्रतियोगितामा शक्ति मावि पाटेचौरका विष्णुहरी वाग्ले, दीपा धौराली, तिलकजंग केसीको टिम दोस्रो भएका छन् । रत्नलक्ष्मी मावि डुम्रीडाँडाका अनिल लामिछाने, चुडामणि सापकोटा, सुरज रेग्मीको टिम तेस्रो भएको शिक्षा विकास तथा समन्वय इकाइ गोरखाका प्रमुख सुवास आचार्यले बताए ।
त्यस्तै, जिल्लास्तरीय खुल्ला वक्तृत्वकला प्रतियोगितामा महालक्ष्मी माविका लक्ष्मीबजारका आरती गुरुङ प्रथम, सरस्वती मावि आहालेका लक्ष्मी श्रेष्ठ दोस्रो र महेन्द्र माविका कुन्दुरका सन्दिप लामा तेस्रो भएका छन् ।
जिल्लास्तरीय खुल्ला विद्यार्थी नृत्य प्रतियोगितामा महालक्ष्मी मावि लक्ष्मी बजार प्रथम, दीर्घेश्वर मावि फुजेल दोस्रो र विन्द्यावासिनी मावि नारेश्वर तेस्रो भएको आचार्यले जानकारी दिए । त्यस्तै, शिक्षक नृत्य प्रतियोगितामा धर्मावती मावि चोरकाटेका वर्षा ढकाल प्रथम, सरस्वती मावि आहालेका अनुष्का श्रेष्ठ दोस्रो र विन्द्यावासिनी मावि नारेश्वरका लक्ष्मी श्रेष्ठ तेस्रो भएका कार्यालय प्रमुख आचार्यले जानकारी दिए ।
प्रतियोगिताको सम्पूण विधामा प्रथम हुनेलाई नगद रु ५ हजार, दोस्रो हुनेलाई चार र तेस्रो हुनेलाई तीन हजारसहित प्रमाणपत्र सम्मान गरिएको छ । सो प्रतियोगितामा प्रथम हुने सबै विधाका समूहले आगामी फागुन २६ गते र २७ गते पोखरामा हुने प्रादेशिक प्रतियोगितामा जिल्लाको प्रतिनिधि गरेर सहभागी हुने शिक्षा विकास तथा समन्वय इकाई गोरखाले जनाएको छ ।
daraudi
