काठमाडौैं । बाहिरबाट आएका संक्रमितबाट स्थानीयमा सरेको संक्रमण (लोकल लेभल स्प्रेड) एक जनामा देखिएसँगै नेपाल पनि कोरोना महामारीको दोस्रो चरणमा प्रवेश गरेको छ ।
यसले थप सजगता र सावधानीको माग गरेको सरकार र चिकित्सकहरुले बताउँदै आएका छन् । नेपालमा कोरोना संक्रमणको दोस्रो चरण देखापरेपछि सरकारले यसको रोकथाम, नियन्त्रण र उपचारको तीन सूत्रीय विधि अपनाएको छ ।
सीसीएमसी, अप्स र पीआरटी सक्रिय
प्रधानमन्त्री केपी शर्मा ओलीले मंगलबार देशवासीका नामममा सम्बोधन गर्दै कोरोना विरुद्धको लडाईंमा विजय प्राप्त गर्न तीन सूत्रीय विधि अपनाएको जानकारी गराए । उनका अनुसार कोभिड–१९ अथवा कोरोना भाइरस रोकथाम तथा नियन्त्रण उच्चस्तरीय समन्वय समितिले समग्र कामको अगुवाइ गरिरहेको छ । यसका अतिरिक्त, आम जनसमुदाय, राजनीतिककर्मी, राष्ट्रसेवक कर्मचारी, सुरक्षा निकाय तथा स्वास्थ्यकर्मीहरुको संयुक्त ‘कमाण्ड’को रुपमा ‘कोरोना संकट व्यवस्थापन केन्द्र (सिसिएमसी)’ स्थापना गरिएको छ ।
जसले युद्धस्तरमा कामको समन्वय, निर्देशन र सम्पादन गर्छ । पहिचान गर्ने, परीक्षण गर्ने र उपचार गर्ने सबै कामलाई समन्वयात्मक ढंगले सम्पादन गर्न यसका ४ संरचना (अप्स) खडा गरिएको छ । बिरामी ओसारपसार (पिआरटी) को उपयुक्त व्यवस्था गरिएको सरकारले जनाएको छ ।
सिसिएमसी केन्द्रदेखि वडास्तरमा
सिसिएमसी सबैको साझेदारीमा सञ्चालन हुने संरचना भएको प्रधानमन्त्रीको ओलीको भनाई हो । मुख्यमन्त्रीको संयोजनमा प्रदेश तहमा र स्थानीय तहको वडास्तरसम्मै यस संरचनाको सञ्जाल निर्माण गरिएको छ ।
स्थानीय तहका वडास्तरसम्म वडा अध्यक्षको संयोजनमा हुने संयन्त्रले आफ्नो वडामा सरकारद्वारा घोषित राहत वितरण गर्नेछ । बिरामी छन् वा छैनन् औषधि–उपचार पाए वा पाएनन्, बेरोजगार विपन्नहरुले खान पाए वा पाएनन् ? त्यसको अनुगमन तथा व्यवस्थापन समेत गर्ने सिसिएमसीले गर्ने छ ।
३० हजार ५ सय ६६ जना अट्ने क्वारेन्टाइन
सरकारले मुलुकभर हाल ३० हजार ५ सय ६६ जनालाई राख्न सकिने गरी क्वारेण्टाइन केन्द्रको व्यवस्था गरेको छ ।
त्यस्तै हाल ९ हजार १ सय ६८ जना क्वारेण्टाइनमा रहेको र ३ हजार २ सय ५९ जना राख्न सक्ने क्षमताको आइसोलेशन वेड तयार गरेको प्रधानमन्त्रीको भनाइ छ ।
हाल आइसोलेसनमा ९५ जना उपचारत रहेको र सकभर सङ्क्रमण फैलिन नदिन र फैलिहालेको अवस्थामा पनि त्यसलाई नियन्त्रण गर्न सरकार पूर्ण तयारीमा जुटेको छ ।
पिसिआर प्रविधिबाट कोरोना परीक्षण
सरकारले यो अवधिमा सातै प्रदेशबाट पोलिमरेज चेन रियाक्सन (पिसिआर) प्रविधिबाट परीक्षण शुरु गरेको पनि जनाएको छ । सोमबारसम्म १ हजार ८ सय ९० जनाको परीक्षण गरिसकिएको तथा सातै प्रदेशका १० परीक्षण केन्द्रबाट परीक्षणलाई तीव्रता दिनुका साथै सङ्क्रमणको उच्च जोखिममा रहेका जिल्लाहरुमा द्रूत परीक्षण (¥यापिड डिटेक्सन टेस्ट–आरडिटी) विधि मार्फत् हजारौंको नमूना परीक्षणको तयारी अगाडि बढाइएको सरकारले जनाएको छ ।
सातै प्रदेशमा, उपचारमा आवश्यक पर्ने पर्सनल प्रोटेक्टीभ इक्वीपमेण्ट (पीपीई) पूरा सेट– १ हजार ४८ थान, गाउन– ११ हजार ८ सय १९ थान, एन ९५ मास्क– ४ हजार ३४५ थान, मास्क– ५ लाख ६५ हजार २६१ थान सहित आवश्यक विभिन्न स्वास्थ्य सामग्रीहरुको व्यवस्था गरिएको छ ।
भेण्टिलेटर सहित अपुग स्वास्थ्य सामग्री तथा उपकरणको थप प्रबन्ध गरिएको प्रधानमन्त्रीको ओलीको सम्बोधनमा समेटिएको छ ।
राताेपाटीबाट
