Trending

मर्स्याङ्दी करिडोरमा पर्यटनको सम्भावनाबारे अध्ययन गरिने

मर्स्याङ्दी नदी दायाँबायाँका स्थानीय तहले मर्स्याङ्दी कोरिडोर क्षेत्रको पर्यटन प्रवद्र्धन र औद्योगिक ग्रामको सम्भाव्यता अध्ययन गर्ने भएको छ ।
पर्यटनका माध्ययमबाट युवालाई रोजगारी दिने र ग्रामीण अर्थतन्त्रलाई बलियो बनाउन पर्यटन र औद्योगिक ग्रामको सम्भाव्यता अध्ययन गरिन लागेको हो । तनहुँको बन्दीपुरमा बसेको अन्तरपालिका समन्वय बैठकबाट कोरिडोर क्षेत्रमा युवालाई रोजगारी सिर्जना गर्ने गरी औद्योगिक ग्राम बनाउने लक्ष्यका साथ यसको सम्भाव्यता अध्ययन गर्ने निर्णय गरिएको अन्तरपालिका अध्ययन उपसमिति गठन गरिएको भानु नगरपालिकाका प्रमुख एवं मर्स्याङ्दी नदी कोरिडोर समन्वय समितिका संयोजक आनन्दराज त्रिपाठीले बताउनुभयो ।
उहाँका अनुसार सरकारले एक पालिका एक उद्योग बनाउने लक्ष्य राखेकोमा मर्स्याङ्दी कोरिडोरमा एउटा ठूलो उद्योग सञ्चालनको लागि पनि पहल गरिनेछ । पालिकाबाट निस्कने फोहरमैला अहिले हरेक पालिका आफैं व्यवस्थापन गरिरहेको अवस्थामा फोहरमैलाको उचित ढंगबाट विसर्जनका लागि यसको दीर्घकालीन व्यवस्थापन समेत गर्ने निर्णय गरिएको छ । कोरिडोरका स्थानीय तहभित्र सिसाजन्य फोहरमैलालाई २ वा २ भन्दा बढी पालिकाको पायक पर्ने उपयुक्त ठाउँ छनोट गरी लगानी साझेदारीको माध्यमबाट व्यवस्थापन गर्ने निर्णय गरिएको छ ।
कोरिडोर अन्तर्गतका पालिकामा ठूला टारहरु रहेकाले यसलाई उपयोग हुने गरी कृषि क्षेत्रमा लगानी बढाएर युवालाई स्वदेशमै रोजगारी सिर्जना गर्ने विषयमा समेत छलफल भएको संयोजक त्रिपाठीले बताउनुभयो । पर्यटकीय सम्भाव्यता अध्ययनको लागि लमजुङको दोर्दी गाउँपालिकाका अध्यक्ष युवराज अधिकारीको संयोजकत्वमा मर्स्याङ्दी कोरिडोर पर्यटन उपसमिति गठन गरिएको छ । समितिको सदस्यमा लमजुङकै राइनास नगरपालिकाका प्रमुख खड्कबहादुर गुरुङ र तनहुँको बन्दीपुर गाउँपालिकाका अध्यक्ष सुरेन्द्रबहादुर थापा रहनुभएको छ ।
संयोजक अधिकारीले मर्स्याङ्दी कोरिडोरमा पर्यटकीय सम्भावनाको खोजी गरी यसको अध्ययन अनुसन्धान गरिने बताउनुभयो । अध्ययन अनुसन्धानका क्रममा स्थानीयको सुझाव संकलन गरिने र त्यसपछिपर्यटन प्रवद्र्धनका कार्यक्रमहरु विस्तारै अघि बढाइने उहाँले बताउनुभयो ।
मर्स्याङ्दी नदी कोरिडोर समन्वय समितिमा हाल तनहुँको भानु नगरपालिका, बन्दीपुर र आँबुखैरेनी गाउँपालिका, लमजुङको बेंसीशहर, सुन्दरबजार र राइनास नगरपालिका तथा दोर्दी गाउँपालिका साथै गोरखाको पालुङटार नगरपालिका समावेश छन् । अब लमजुङको मर्स्याङ्दी गाउँपालिकालाई समावेश गर्ने निर्णय गरिएको र यो समेत गरी ९ वटा स्थानीय तह समितिमा रहने उहाँले बताउनुभयो । कोरिडोर अन्तर्गतका स्थानीय तहबीच ३/३ महिनामा संयुक्त बैठक बस्ने र अर्को बैठक फागुन १२ गते बेंसीशहर नगरपालिकामा बस्ने निर्णय गरिएको संयोजक अधिकारीले बताउनुभयो ।

Leave a Reply

Your email address will not be published. Required fields are marked *

Back to top button
Close

Adblock Detected

Please consider supporting us by disabling your ad blocker