गोरखा : काठमाडौँबाट गोरखाबजार हुँदै सोती जाँदै गरेको रात्रीबस बुधबार बिहान दुर्घटना हुँदा पाँच जना गम्भीर घाइते भएका छन्।
ग १ ख ९४४६ नम्बरको रात्रीबस भीमसेन थापा गाउँपालिका ३ को मुरलीचोकमा दुर्घटना हुँदा पाँच जना घाइते भएका प्रहरी निरीक्षक धर्म अधिकारीले जानकारी दिए।
घाइते हुनेहरुमा धार्चे ६ का ५० वर्षीय सुरमान घले, भीमसेन थापा गाउँपालिका ३ का २९ वर्षीय उत्तम पुडासैनी, ३० वर्षीय मनोज पुडासैनी र उज्वल पुडासैनी रहेका छन्। त्यस्तै धार्चे २ केरौँजाकी ३२ वर्षीया कान्छी गुरुङ रहेको प्रहरीले जनाएको छ। उनीहरुको टाउको र छात्तीमा चोट लागेको छ।
गम्भीर घाइते तीन जनालाई काठमाडौँ र दुई जनालाई गोरखा अस्पतालमा उपचारका लागि लगिएको प्रहरी निरीक्षक अधिकारीले बताए। बसमा करिब ४० जना सवार रहेको र अन्यको अवस्था समान्य रहेको प्रहरीले जनाएको छ।
चालक तोपमान तामाङ निदाएका कारण बस खसेको हुनसक्ने प्रारम्भिक अनुमान रहेको प्रहरीले बताएको छ।
