दाङ — विशेषज्ञ सेवा विस्तारसँगै Rapti Academy of Health Sciences मा उपचारका लागि आउने बिरामीको संख्या उल्लेख्य रूपमा बढेको छ। प्रतिष्ठानमा दैनिक करिब एक हजार बिरामी उपचारका लागि पुग्ने गरेका छन्।
यसैक्रममा प्रतिष्ठानले बिरामीको सेवा सहज बनाउन शुक्रबार आयोजना गरेको बृहत् क्यान्सर परामर्श तथा परीक्षण शिविरमा करिब ३ सयभन्दा बढीले स्वास्थ्य जाँच गराएका छन्। बिहान ९ बजेदेखि बेलुकी ४ बजेसम्म सञ्चालन भएको शिविरमा मेडिसिनतर्फ २१ जना, गाइनो तर्फ १९३ जना र सर्जरीतर्फ ७२ जनाको परीक्षण गरिएको निमित्त उपकुलपति तथा रजिस्ट्रार Shyam Lamsal ले जानकारी दिए।
उनका अनुसार प्रतिष्ठानले क्यान्सर उपचार सेवा सुरु गर्ने तयारी गरिरहेको छ र यस्ता शिविरहरूले क्यान्सरका बिरामी पहिचान तथा उपचार प्रक्रियालाई सहज बनाउने अपेक्षा गरिएको छ।
शिविर BP Koirala Memorial Cancer Hospital को प्राविधिक सहयोगमा सम्पन्न भएको हो। उक्त अस्पताल र प्रतिष्ठानबीच यसअघि भएको सहकार्य सम्झौताअनुसार कार्यक्रम आयोजना गरिएको र आगामी दिनमा पनि यस्ता गतिविधि निरन्तर सञ्चालन गरिने प्रा. लम्सालले बताए।
शिविरमा क्यान्सर अस्पताल भरतपुरका विशेषज्ञ चिकित्सकहरू—मेडिकल अंकोलोजिस्ट डा. विवेक कंडेल, ब्रेस्ट सर्जन डा. अनुप भट्टचन, युरोलोजिस्ट डा. बोधराज गौतम र गाइनो अंकोलोजिस्ट डा. अस्मिता ओली—सहित प्रतिष्ठानका चिकित्सक तथा स्वास्थ्यकर्मी खटिएका थिए।
