तनहुँ, मंसीर १३ गते
अमरराज नहर्की
नेकपा एमाले तनहुँमा महाधिवेशन प्रतिनिधि चयनका क्रममा क्षेत्र नम्बर २ ले उत्कृष्ट उदाहरण प्रस्तुत गर्दै सबै पदमा सर्वसम्मत चयन गरेको छ । निर्वाचन संयोजक अधिवक्ता शिवदत्त ढकालका अनुसार खुलातर्फ श्रीप्रसाद श्रेष्ठ, राजेश्वर ढकाल र विष्णुभक्त सिग्देल, महिलातर्फ बिर्सना श्रेष्ठ र विष्णु अधिकारी पराजुली तथा युवा तर्फ उज्ज्वल खनाल सर्वसम्मत रूपमा चयन भएका छन् ।
यसले एमाले संगठनभित्र क्षेत्र २ मा एकता, सहकार्य र संयमित नेतृत्वको संस्कार अझ बलियो बनेको संकेत दिएको छ ।
तर क्षेत्र नम्बर १ मा सहमति जुट्न नसक्दा आज प्रत्यक्ष मतदान भइरहेको छ । मनोनयन दर्ता गरेपछि पनि कसैले नाम फिर्ता नलिएपछि केन्द्रीय सदस्य तथा तनहुँ इन्चार्ज केदार सिग्देल, केन्द्रीय सल्लाहकार एकबहादुर राना र प्रतापलाल श्रेष्ठको पहल सफल हुन सकेन ।
जिल्लाभरका ५ हजार ६९३ संगठित सदस्य मतदाता रहेका छन् । क्षेत्र १ मा २,४०७ र क्षेत्र २ मा ३,२८६ सदस्य छन् । भिमादमा सबैभन्दा धेरै र ऋषिङमा सबैभन्दा कम सदस्य रहेका छन्।
बिहान ९ बजेदेखि सम्बन्धित पालिकाले तोकेको केन्द्रमा मतदान भइरहेको छ । मतदान सकिएपछि मतपेटिका जिल्ला पार्टी कार्यालयमा ल्याएर केन्द्रीय संगठन विभागको नामावलीअनुसार मतगणना सुरु हुनेछ ।
क्षेत्र नम्बर २ को सर्वसम्मति—एमाले संगठनभित्र सकारात्मक सन्देश !
