तनहुँ ११ मंङ्गसिर
व्यास नगरपालिका–१ रतौली स्थित जलेश्वर महादेव मन्दिरमा आयोजित श्रीमदभागवत सप्ताह ज्ञान महायज्ञमा आजसम्म १६ लाख बढी दान संकलन भएको छ ।
मन्दिरमा बहुउद्वेश्यीय धर्मशाला,होम कुण्ड र शिव लिङ्ग कुण्ड निर्माण गर्ने उद्वेश्यले यही मंसिर ६ गतेदेखि महायज्ञमा सुरु भएको हो ।
बिहीबारसम्म रु.१६ लाख २७ हजार ७६२ दान सहयोग प्राप्त भएको छ भने आज मात्रै ६ लाख ९१ हजार ७९६ संकलन भएको आयोजक समितिले जनाएको छ ।
यस क्षेत्रलाई धार्मिक पर्यटनको रुपमा विकास गर्न पितृ मोक्ष धनधान्याञ्चल श्रीमद भागवत सप्ताह ज्ञान महायज्ञ धार्मिक महोत्सव सार्वजनिक संगीतमय कार्यक्रमको आयोजना गरिएको हो ।
बिहीबार सबै भन्दा बढी सोही वडा स्थित सिर्जना आमा समुहले रु.१ लाख ११ हजार १११ दान सहयोग गरेको रतौली टोल विकास संस्थाका अध्यक्ष एवं महायज्ञ संयोजक अभिमानसिं बस्नेतले जानकारी दिनुभयो ।
धार्मिक पर्यटकीयस्थलको रुपमा विकास गर्नका लागि रतौली टोल विकास संस्थाको आयोजना तथा सृजना आमा समुह र जलेश्वर मन्दिर संरक्षण समिति सहआयोजक रहेका छन् ।
महायज्ञबाट प्राप्त दानबाट एकसय जनासम्म क्षमताको भक्तजनलाई राख्न सकिने सुविधा सम्पन्न बहुउद्वेश्यीय धर्मशाला निर्माण गर्ने योजना रहेको रहेको छ ।
संयोजक बस्नेतले भन्नुभयो,“जलेश्वर महादेवको मूर्ति स्तरीकरणका साथै होम कुण्ड र शिव लिङ्ग कुण्ड निर्माण गरी थप पर्यटन प्रबद्र्धन गर्ने प्रमुख उद्वेश्य रहेको छ ।”
उक्त महायज्ञमा पण्डित कपिलदेव भट्टले कथा वाचन गर्नु भएको छ । महायज्ञमा कथा वाचनका साथै राष्ट्रिय कलाकारहरुो बेजोड प्रस्तुती नाटक र भजनकीर्तन कार्यक्रम रहेको छ ।
प्रसिद्ध धार्मिकस्थल छाब्दी बाराही,बेदव्यास लगायतका धार्मिक पर्यटकीय क्षेत्रमा घुम्न आएका धर्मावलम्वीलाई खाना र बस्न समस्या भएको अवस्थामा धर्मशालामा राख्ने व्यवस्था मिलाइने प्रचारप्रसार समितिका संयोजक दीपक बस्नेतले बताउनुभयो ।
दमौली र आसपास क्षेत्रका धार्मिक भुगोललाई समेटन सकिए धार्मिक पर्यटकीयस्थलको रुपमा विकास गर्न सकिने प्रचूर संम्भावना देखिएको छ ।
महायज्ञको संरक्षणकमा वडा कार्यालय रहेको छ । पूर्वमन्त्री शंकर भण्डारीबाट रु.३० हजार,रामचन्द्र बस्नतेले २५ हजार र जिन्सीतर्फ व्यवसायी डिलबहादुर दरैबाट ५५ हजार बराबरको सहयोग गर्नुभएको वडासदस्य एवं महायज्ञका सल्लाहकार मणिजंग बस्नेतले जानकारी दिनुभयो ।
