मंसिर ४, गाेरखा ।
गोर्खाको पालुङ्टार नगरपालिका वडा नं ७ च्याङ्ली मा वडा अध्यक्ष कप फुटबल प्रतियोगिता सुरु भएको छ। वडा नं ७ का वडा अध्यक्ष अर्जुनबहादुर कुमाल को प्रमुख आतिथ्यतामा सम्पन्न भएको उद्घाटन खेलमा आज दुई खेल सम्पन्न भएको छ। DDYC खत्रीटार र युनाइटेड च्याङ्ली युथ क्लब बीच भएको पहिलो खेलमा DDYC २ – ० गोल अन्तरले अगाडि बढेको थियो। त्यस्तैगरी आजै भएको दोस्रो खेलमा आयोजक नागास्थान युवा क्लब NYC ले बोटेगाउँ युवा क्लब BYC लाई ३ – ० गोल अन्तरले पछि पार्दै नागस्थान युवा क्लब अघि बढेको छ। आयोजक नागास्थान युवा क्लब का अध्यक्ष विजय बाबु कुमालको सभापतित्वमा सम्पन्न भएको उद्घाटन समारोहमा जिल्ला खेलकुद विकास समिति गोर्खाका अध्यक्ष प्रेमबहादुर तामाङले विशिष्ट अतिथिको रुपमा आफ्ना भनाइहरु राख्नुभएको थियो। सोही क्लबकी उपाध्यक्ष सामना कुमालले स्वागत मन्तव्य राख्नुभएको थियो। नागास्थान युवा क्लबद्वारा नवनिर्मित खेलमैदानमा मंसिर ४ गतेदेखि सुरु भएको उक्त फुटबल प्रतियोगिता को समापन मंसिर ६ गते हुने क्लबका सचिव टिकाराम कुमालले जानकारी दिनुभयो । उहाँका अनुसार मङ्सिर ५ गते चार खेल सम्पन्न हुनेछन् भने ६ गते फाइनल खेल खेलाइने छ ।
विजेता टिमले रु ३५००० नगद पुरस्कारसहित प्रमाणपत्र र ट्रफी पाउनेछन् भने उपविजेताले नगद रु २० हजार सहित ट्रफी र प्रमाणपत्र पाउनेछन् । त्यस्तैगरी खेलमा उत्कृष्ट गोल रक्षक डिफेन्डर उदयमान खेलाडी लगायतकालाई विशेष रुपमा पुरस्कृत गरिने पनि आयोजकले जनाएको छ।
