काठमाडौं । एनपीएलको दोस्रो संस्करण अन्तरगत दोस्रो दिनको दोस्रो म्याचमा त्रिवि मैदानमा रन वर्षा भएको छ । पहिलो इनिङमा विराटनगर किङ्सले पोखरा एभेन्जरविरुद्ध धुवाँधार ब्याटिङको नजारा देखायो ।
पोखरा एभेन्जर्सलाई २२१ रनका विशाल लक्ष्य दिँदा विराटनगरले केही महत्त्वपूर्ण कीर्तिमानहरू राखेको छ । विराटनगरले बनाएको २२० रन एनपीएलका दुवै संस्करणमा अहिलेसम्मकै उच्च टिम स्कोर हो । एनपीएलमा २०० रनको स्कोर यसअघि कुनै पनि टिमले पार गर्न सकेका थिएनन् । विराटनगरले फ्लडलाइटको उज्यालोमा यो माइलस्टोन कायम गरेको छ ।
योभन्दा अघिको उच्च स्कोर पहिलो संस्करणमा विराटनगरले नै बनाएको १९३ रन थियो । त्यसबेला पनि विराटनगरका ओपनर लोकेस बमले अर्धशतक बनाएका थिए, लगभग अहिलेकै गतिमा । त्यसबेला उनले ४७ बलमा ८ छक्का र ३ चौकासहित ७१ रन हानेका थिए भने आज ७ छक्का र १ चौकासहित ४८ बलमा ७२ रन प्रहार गरे ।
लोकेशले प्रहार गरेको ७ छक्का पनि कीर्तिमानी नै हो । एनपीएलको एकै इनिङमा ७ छक्का प्रहार गर्ने उनी तेस्रो ब्याटर बनेका छन् । अघिल्लो संस्करणमा नेपालकै दुई ब्याटर कुशल मल्ल र विवेक यादवले एक म्याचमा ७–७ छक्का प्रहार गरेका थिए ।
आज बनेको अर्को कीर्तिमान हो दोस्रो विकेटका लागि सर्वाधिक ठूलो साझेदारी । १४ रनमा पहिलो विकेटका रूपमा जर्ज मुन्सेलाई गुमाएपछि लोकेश बम र मार्टिन गप्टिलले दोस्रो विकेटका लागि लामो साझेदारी गरेका थिए । उनीहरुबीच छक्का हान्ने प्रतिस्पर्धा नै चलेको थियो । उनीहरुले १३२ रनको साझेदारी केवल ७५ रनमा बनाए ।
योभन्दा अगाडि पहिलो संस्करणमा सुदूरपश्चिमका लागि ब्रान्डेन म्याकमुलेन र बिनोद भण्डारीले ८६ रनको साझेदारी गरेका थिए । समग्रमा यो एनपीएल कुनै पनि विकेटका लागि दोस्रो सर्वाधिक ठूलो साझेदारी हो । पहिले संस्करणमा पोखराका दिनेश खरेल र एन्ड्र्यू गोउसले गरेको १७६ रनको साझेदारी अहिलेसम्म पहिलो नम्बरमा सुरक्षित छ ।
एउटै इनिङमा सर्वाधिक छक्काको कीर्तिमान पनि आज बन्यो । विराटनगरका ब्याटरहरुले पोखराविरुद्ध कुल १७ छक्का प्रहार गरे । लोकेशले ७ छक्का हान्दा गप्टिलले ५ पटक बललाई उडाएर बाउन्ड्री पार गराए । दुई वटा छक्का शुभम रन्जनेको नाममा रह्यो । जर्ज मुन्से, बसिर अहमद र नारायण जोशीले एक–एक छक्का हाने ।
पावरप्लेमा सर्वाधिक रनको कीर्तिमान पनि आज बनेको छ । यो रेकर्ड भने पोखराले बनायो । पोखराले पहिलो ६ ओभरमै एक विकेटको मात्र क्षतिमा ७७ रन जोडेर बिराटनगरलाई अत्याएको थियो । पहिलो विकेटका रूपमा दिनेश खरेल आउट भएपछि कप्तान कुशल भुर्तेल र ईंग्ल्यान्डका एडम रोसिङटनले जबरजस्त काउन्टर अट्याक गरे । उनीहरु दुवैले चौका र छक्का वर्षा गर्न थालेपछि विराटनगर क्याम्प नर्भस बनेको थियो । तर, पावर प्ले सकिनासाथ सातौँ ओभरमा यो जोडी टुट्यो ।
आठौँ ओभरमा विराटनगरका कप्तान सन्दीप लामिछानेले घातक बलिङ गर्दै खेललाई अर्को दिशा दिएका थिए । उनले पोखराका ‘ट्रम्प कार्ड’ को रूपमा रहेका जेम्स निसमलाई डकआउट गर्नुका साथ त्रितराज दासलाई बोल्ड गरेपछि खेलमा विराटनगरको हुंकार स्थापित भयो । त्यसपछि पोखराको हातबाट खेल फुत्किँदै गयो ।
बलिङतर्फको कुरा गर्ने हो भने पोखराका लागि बिर्सनलायक रह्यो । तीनजना बलरले ४० वा सोभन्दा बढी रन खर्चेको पहिलोपटक हो । आजको म्याचमा पोखराका कुनै पनि बलरले रनमा अंकुश लगाउन सकेनन् । आकाश चन्दले एक विकेट लिएर ४८ रन र म्याट टेलरले २ विकेट लिएर ४८ रन नै खर्चिए । यस्तै सागर ढकालले एक विकेट लिँदा ४० रन खाए ।
nepalpress
