कञ्चनपुर । महाकाली प्रादेशिक अस्पतालमा देखिएका अनियमितता, सेवामा कमजोरी र प्रशासनिक बेथितिविरुद्ध नेपाल कम्युनिस्ट पार्टी (बहुमत), जिल्ला समिति कञ्चनपुरले १२ बुँदे ज्ञापनपत्र अस्पताल प्रशासनलाई बुझाएको छ ।
पार्टीका अनुसार जिल्लावासीले विगत केही समयदेखि अस्पतालको सेवा तथा व्यवस्थापनसम्बन्धी गुनासा अघि सारेका थिए, जसका आधारमा पार्टीले अध्ययन गरी उक्त ज्ञापनपत्र बुझाएको हो । पार्टीले अस्पताल प्रशासनलाई सात दिनभित्र माग सम्बोधन गर्न चेतावनी दिँदै माग पूरा नभए “कडा जनसंघर्षमा उत्रिने” चेतावनी समेत दिएको छ ।
१२ बुँदे मागहरूमा समावेश प्रमुख विषयहरूः
१. लामो समयदेखि बन्द रहेको अक्सिजन प्लान्ट तत्काल सञ्चालनमा ल्याउन माग ।
२. अस्पतालको मेडिकलमा नियमित औषधि अभावका कारण सर्वसाधारणले भोगिरहेको समस्या समाधान गर्न ।
३. करार कर्मचारीमाथि भेदभावपूर्ण व्यवहार अन्त्य गरी सबैलाई समान सेवासुविधा सुनिश्चित गर्न ।
४. निड्स नेपाल र अस्पतालबीचको सम्झौता सकिएपछि पनि कानुनी प्रक्रिया उल्लङ्घन गरी कर्मचारी राखिएको भन्दै कारबाहीको माग ।
५. स्वास्थ्य बीमा र न्यूनतम शुल्कमा हुनुपर्ने ईको, ईन्डोस्कोपी, युएसजी सेवा महँगो शुल्कमा दिइएको भन्दै सुधारको माग ।
६. भर्खरै सञ्चालनमा आएको सिटी–स्क्यान सेवामा देखिएका समस्या समाधान र बीमा सेवा लागू गर्न ।
७. केही प्राविधिक कर्मचारीले राजनीतिक पहुँचको दुरुपयोग गरी पदिय जिम्मेवारीमा हस्तक्षेप गरेको आरोप ।
८. प्रशासनिक कर्मचारीहरूले अनियमित रूपमा ओभरटाइम र काज भत्ता लिइरहेको गुनासो ।
९. “On call” कन्सल्टेन्ट डाक्टरहरू आपत्कालीन अवस्थामा उपलब्ध नहुनु, जसले सर्वसाधारणलाई सेवाबाट वञ्चित बनाएको ।
१०. चिकित्सकहरूको कार्यालय समयमा ढिलाइ र समयअगावै प्रस्थान गर्ने प्रवृत्तिमा नियन्त्रण गर्न ।
११. ई–हाजिर प्रणालीको दुरुपयोग तत्काल रोक्न ।
१२. कानुनी प्रक्रिया विपरीत पूर्व जनप्रतिनिधिहरूलाई कर्मचारी नियुक्तिमा संलग्न गराइएको भन्दै छानबिनको माग ।
पार्टीका जिल्ला सचिव डम्बर विष्टले हस्ताक्षरित उक्त ज्ञापनपत्रमा भनिएको छ, “अस्पताल प्रशासनले गम्भीरता पूर्वक मागहरू सम्बोधन नगरे आगामी सात दिनभित्र हाम्रो पार्टी बाध्यतावश जनसंघर्षमा उत्रिनेछ ।”
